مستەفا كازمی، سەرۆك وەزیرانی عێراق، ئەمڕۆ یەكشەممە، سەرۆكایەتی كۆبونەوەیەكی بەپەلەی كرد لەبارەی ئاسایشی خۆراك و بەرزبونەوەی نرخی خۆراك، وەزارەتە پەیوەندیدارەكانیشی راسپارد رێوشوێنی پێویست بگرنە بەر بۆ دەستەبەركردنی ئاسایشی خۆراك و رێگری لە بەرزبونەوەی نرخی شتومەك و خۆراك.
ئاوێنە: بەپێی راگەیەندراوێكی نوسینگەكەی، ئەمڕۆ یەكشەممە، مستەفا كازمی، سەرۆك وەزیرانی عێراق سەرپەرشتی كۆبونەوەیەكی بەپەلەی كردوە بۆ تاوتوێكردنی ئاسایشی خۆراك و بەرزبونەوەی نرخی شتومەك و خۆراك، ئەوەش بە ئامادەبونی هەریەكە لە وەزیرانی دارایی، وەزیری دەرەوە، وەزیری پلاندانان، وەزیری بازرگانی، وەزیری كشتوكاڵ، وەزیری سەرچاوەكانی ئاو، وەزیری پیشەسازی، ئەمینداری گشتی ئەنجومەنی وەزیران و ژمارەیەك لە راوێژكاران.
بەگوێرەی راگەیەندراوەكە لە كۆبونەوەكەدا گفتوگۆ لەبارەی دەستەبەركردنی ئاسایشی خۆراك كراوە ئەوەش لەسایەی قەیرانی جەنگی روسیاو ئۆكرانیا.
هەروەك سەرۆك وەزیران جەختی لەسەر گرنگی دەستەبەركردنی كۆگا ستراتیژییەكان بۆ خۆراكە بنەڕەتییەكان و لابردنی ئەو كۆسپانە كردۆتەوە كە روبەڕوی ئەو پڕۆسەیە دەبنەوە.
مستەفا كازمی هەروەها وەزارەتەكانی دارایی و بازرگانی و كشتوكاڵی راسپاردوە بۆ گرتنەبەری رێكاری پێویست لەوڕوەوە، لەگەڵ دانانی پرسی ئاسایشی خۆراك و دەستەبەركردنی كۆگای ستراتیژی لە كارنامەی كۆبونەوەی ئەم هەفتەیەی ئەنجومەنی ئابوریی وەزیران و ئەنجومەنی وەزیرانداو گرتنەبەری رێكاری پێویست لەوبارەیەوە.
هەروەك لە بەشێكی دیكەی كۆبونەوەكەدا دۆخی ئاو لە عێراق گفتوگۆی لەبارەوە كراوەو راسپاردە دەركراوە بۆ دەستەبەركردنی پشكی ئاوی پێویست بۆ كشتوكاڵ بەتایبەت كشتوكاڵی پەیوەست بە بەروبومە بنەڕەتییەكان.