مستەفا كازمی، سەرۆك وەزیرانی عێراق، ئەمڕۆ هەینی، رایگەیاند، "ئەو ئەركەی بۆی بانگهێشتكرابوین، رامانپەڕاند...بەرژەوەندی خۆمان پێش بەرژەوەندی گەلەكەمان نەخست، داشنەبەزین بۆ ئاستی دەمەقاڵەو موزایەدەكردنەكان."
ئاوێنە: مستەفا كازمی، لە تویتێكدا وتویەتی"ئەو ئەركەی بۆی بانگهێشتكرابوین كە خزمەتكردنی گەلی عێراقی مەزنە، رامانپەڕاند. هیچ كات راڕاو كەمتەرخەم و سازشكار نەبوین لەسەر بەرژەوەندییە نیشتمانییە باڵاكان، بەرژەوەندی خۆمان پێش بەرژەوەندی گەلەكەمان نەخست، داشنەبەزین بۆ ئاستی دەمەقاڵەو موزایەدەكردنەكان."
سەرۆك وەزیرانی عێراق وتوشیەتی""نیشتمانمان گەیاندە هەڵبژاردنێكی ئازادی بێگەرد، سەرباری لەمپەرە ناوخۆیی و ئاڵنگارییە دەرەكییەكانيش؛ بەئارامی بنەماكانی تێپەڕاندنی قەیرانە ئابوری و ئەمنی و كۆمەڵایەتییە گەورەكانمان دانا، عێراقمان بەسەربەرزی گێڕایەوە بۆ ئامێزی هەردو كۆمەڵگای هەرێمایەتی و نێودەوڵەتی، ڕێگای بەرەنگاربونەوەی گەندەڵی و گەندەڵكارانمان كردەوەو دەوڵەتیشمان لە چنگی تاقمەكانی "لا دولة" دەرهێنا، بە لێبڕانی قارەمانەكانی هێزە سەربازی و ئەمنی و هەواڵگرییەكانمان تیرۆر و شانەكانی و كلكەكانیمان بێدەنگ كرد."
کازمی جەختیکردوەتەوە"ئەو هێز و حیزب و كەسایەتییە نیشتمانیانەی لە هەناوی پرۆسەی هەڵبژاردن هاتونەتە دەرەوە، ئەمڕۆ بەرپرسیارێتی پاراستی ڕاڕەوی نیشتمانییان لە ئەستۆدایە لە ڕێگای كۆتاییهێنان بە چەقبەستنی سیاسی و پێكهێنانی حكومەتێك كە شان بداتە بەر ئەركەكان و نیشتمان بپارێزێت و بەرگری لە یەكێتی و تواناكانی بكات، دەستخۆشیش لە هەمو هەوڵێك دەكەین كە لەم رێگایەدا و بۆ ئەم ئامانجە كار بكات."