حاكم زاملی، جێگری یەكەمی سەرۆكی پەرلەمانی عێراق، ئەمڕۆ چوارشەممە، رایگەیاند، لەبارەی هێرشە موشەكییەكەی سەر هەولێر، پەرلەمان میوانداری وەزیری ناوخۆی هەرێم و باڵیۆزی عێراق لە بەغدا دەكات و دەشڵێت: لیژنەیەكی بەدواداچونی راستییەكان هەندێك زانیاری لەبارەی هێرشەكەوە كۆكردونەتەوە.
ئاوێنە: خاكم زاملی بە ئاژانسی رەسمی عێراقی وتوە، پەرلەمانی عێراق هەڵوێستی لەبارەی هێرشە موشەكییەكەی سەر هەولێر دەبێت.
وتوشیەتی، لیژنەیەكی بەدواداچونی راستییەكان سەردانی هەرێمی كوردستانی كردوەو لەبارەی هێرشەكەوە هەندێك زانیاری كۆكردونەتەوە.
ئاشكراشیكردوە، پەرلەمانی عێراق میوانداری وەزیری ناوخۆی هەرێم دەكات بۆ ئەوەی ئاگاداری دۆخی روداوەكە بێت و داواشمان لە وەزیری ناوخۆی هەرێم كردوە راپۆرتێكی ورد لەوبارەیەوە لەگەڵ خۆی بهێنێت.
ئاماژەی بەوەشداوە كە دانیشتنی میوانداریكردنی وەزیری ناوخۆی هەرێم سبەی یان دواتر لە پەرلەمانی عێراق بە ئامادەبونی سەرۆكی فراكسیۆنەكان و پەرلەمانتاران بەڕێوەدەچێت.
ئاماژەی بەوەشداوە كە لیژنەی لێكۆڵینەوە لە راستییەكان تاوتوێی بابەتەكە دەكات و لە راپۆرتێكی وردا ئەنجامەكان دەخاتەڕو.
حاكم زاملی جەختی كردۆتەوە كە "رێگە بە پێشێلكردنی سەروەری عێراق نادەن" و وتوشیەتی"هەروەها باڵیۆزی ئێرانیش لە عێراق میوانداری دەكرێت." بەبێ ئەوەی وادەكەی دیاری بكات.