ئەمڕۆ پێنجشەممە سەرۆکایەتی پەرلەمانی عێراق و سەرۆک فراکسیۆنەکان لەگەڵ لیژنەی لێکۆڵینەوە لەهێرشە موشەکییەکەی سەر هەولێر کۆدەبنەوە، لە کۆبونەوەکەدا رێبەر ئەحمەد، وەزیری ناوخۆی هەرێمی کوردستانیش بەشدار دەبێت.
ئاوێنە: پێش نیوەڕۆی ئەمڕۆ رێبەر ئەحمەد، وەزیری ناوخۆی هەرێمی کوردستان گەیشتە پەرلەمانی عێراق و لەئێستادا لەگەڵ سەرۆکایەتی پەرلەمان و لیژنەی لێکۆڵینەوە لەهێرشە موشەکییەکەی سەر هەولێر لەکۆبونەوەدایە.
بەگوێرەی زانیارییەکان لەکۆبونەوەکەدا سەرۆکایەتیی پەرلەمانی عێراق، لیژنەی لێکۆڵینەوە لە موشەکبارانەکەی هەولێر، سەرۆک فراکسیۆنەکان بەشدار دەبن و رونکردنەوەیان لەبارەی روداوەکە پێدەدرێت.
لە کۆبونەوەکەدا میوانداریی رێبەر ئەحمەد، وەزیری ناوخۆی حکومەتی هەرێمی کوردستانیش کراوە، پەرلەمان دەیەوێت سود لە زانیاریی و وەڵامەکانی وەزیری ناوخۆی هەرێم وەربگرێت، هەروەها ژمارەیەک بەرپرسی باڵای سەربازی حکومەتی عێراقیش ئامادەی کۆبونەوەکە بون.