هاوپەیمانی ئیشراق کانون کە هاوپەیمانییەکە لەنێوان 10 پەرلەمانتاری سەربەخۆ لە پەرلەمانی عێراق رایگەیاند، هاوپەیمانییەکەیان پڕۆژەیەکیان هەیە و ئەگەر کوتلەی زۆرینەی پەرلەمانی پڕۆژەکەیان پەسەندبکات بەشداری کۆبونەوەی هەڵبژاردنی سەرۆک کۆمار دەکەن، بەپێچەوانەوە بایکۆتی کۆبونەوەکە دەکەن.

ئاوێنه‌: هاوپەیمانی ئیشراق کانون لەراگەیەنراوێکدا باسی لەوەشکردوە، بەشداریکردنیان لەکۆبونەوەکەی رۆژی شەممە پەیوەستە بە جێبەجێکردنی داواکارییەکانیان بۆ راستکردنەوەی پرۆسەی سیاسی و داڕشتنی بنەمایەک بۆ کارکردنی زۆرینەی سیاسی بەرەچاوکردنی بونی ئۆپۆزسیۆنێک کە بتوانێت ئەرکە و رۆڵی خۆی لەپێناو بەرژەوەندی گشتیدا جێبەجێ بکات.

ئەوەش هاتوە، هاوپەیمانییەکەیان داوای حکومەتێکی بەهێز دەکات بەبێ پەراوێزخستنی سیاسی و دورخستنەوەی لایەنەکان لە بەشداری حکومەت، لە هەمان کاتیشدا حکومەتی سازان کە هەمو لایەنەکان تیایدا بەشداربن رەتدەکەنەوە، هەروەها داوای چاکسازی دەکەن بەجۆرێک سەرۆکایەتییەکان، دەستە سەربەخۆکان بگرێتەوە و پێوەر و بنەما هەبێت بۆ دانانی وەزیر و بەرپرسان، هەروەها کوتلەی زۆرینە بەڵێنی چاکسازی سیاسی، ئابوری بدات و بەرەنگاری گەندەڵی ببێتەوە.

هاوپەیمانی ئیشراق داواش دەکات حکومەتی هاوپەیمانی نیشتیمانی کۆتایی پێبهێنرێت، پشک پشکێنە و گەندەڵی سیاسی بنڕبڕ بکرێت، لایەنەکان لەنێوان بەرەی حکومەت و ئۆپۆزسیۆندا کار بکەن، بەجۆرێک هەمو لایەنێک دیاربێت کەئەرکی حکومڕانی دەبینێت یان دەبێتە چاودێر بەسەر حکومڕانەکانەوە.

رۆژی شەممەی داهاتو (26-3-2022) پەرلەمانی عێراق بۆ هەڵبژاردنی سەرۆک کۆمار کۆدەبێتەوە، بەپێی بڕیاری دادگای باڵای فیدراڵیی عێراقیش بۆ هەڵبژاردنی سەرۆک کۆمار، پێویستە دو لەسەر سێی ئەندامانی پەرلەمان کە دەکاتە 220 ئەندام لە دانیشتنەکەدا ئامادەبن.