ئیحسان عەبدولجەبار وەزیری نەوتی عیراق دەڵێت، هیچ نیازێكیان نییە نرخی سوتەمەنی بەرزبكەنەوە، بەرزبونەوەی نرخی بەنزینیش لە هەندێك پارێزگا بەهۆی بەقاچاغ بردنیەوەیە.
ئاوێنه: ئیحسان عەبدولجەبار بە ئاژانسی عیراقییەی وتووە، دروستبوونی قەیرانی سوتەمەنی لەبەشێك لە پارێزگاكاندا بەهۆی بەقاچاغ بردنیەوەیە، ئەوەش بۆ دەرەوەی سنوری عیراق نییە بەڵكو بەشێكی وەك بەنزینی بازرگانی دەفرۆشرێت لەلایەن كۆمپانیاكانەوە، جگە لەوەی ژمارەیەك كۆمپانیای وەبەرهێنان هەن كە پشكیان لە وێستگەكان زیاترە.
بەپێی قسەكانی وەزیری نەوتی عیراق، وەزارەتەكەی نرخی یەك لیتر بەنزین بە 450 دینار و غاز بە 400 دینار بە هاوڵاتیان دەفرۆشێت لەكاتێكدا نرخە جیهانییەكەی هەزار و 500 دینارە، بەڵام ئەوان پشتگیری نرخەكە دەكەن.
هێمای بۆ ئەوەش كردووە، هیچ چارەسەرێك نییە جگە لە بەرزكردنەوەی نرخەكەی، بەڵام هیچ نیازێكیان نییە بۆ ئەو كارە، چونكە ناتوانن لەوە زیاتر فشار بخەنە سەر توێژە هەژارەكەی كۆمەڵگە.