وەزارەتی دەرەوەی عێراق رایگەیاند، هیچ رێککەوتنێکان لەگەڵ تورکیا نییە، کە رێگە بەو وڵاتە بدات بێتە ناو خاکی عێراقەوە.
ئاوێنه: ئەحمەد سەحاف، وتەبیژی وەزارەتی دەرەوەی عێراق لە لێدوانێکی رۆژنامەنوسیدا رایگەیاند، شاندێکی باڵای وەزارەتی دەرەوەی عێراق بە ئامادەبوونی فوئاد حسێن، وەزیری دەرەوە لەگەڵ پەرلەمان کۆبوونەوە لەبارەی هەڵسەنگاندنی وەڵامە ئابووری و سیاسییەکانی عێراق بۆ بۆردوومانەکانی تورکیا و ئێران.
ئاماژەی بەوەش کرد، لە کۆبوونەوەکەی پەرلەماندا وەزیری دەرەوەی عێراق دۆسیەی هەبونی حزبی کرێکارانی کوردستانی لە عێراق خستووەتە بەردەم پەرلەمان و رەتیکردووەتەوە هیچ رێککەوتنێکیان لەگەڵ تورکیا هەبێت کە رێگە بە تورکیا بدات بێتە ناو خاکی عێراقەوە.
ئەحمەد ئەلسەحاف ئەوەشی خستەڕوو، یەک رێککەوتنی ساڵی 2003ی نێوان عێراق و تورکیا هەیە کە رێگە بە تورکیا دەدات بە قوڵای پێنج کیلۆمەتر و بۆ چەند رۆژێکی دیاریکراو بە ئاگاداری پێشوەختەی حکومەتی عێراق لە ناو خاکی عێراق بەرگری لە خۆی بکات.
باسی لەوەشکرد، هێرشەکانی تورکیا بێ بنەمان و شکاندنی یاسان و ئەگەر ئەو هیرشانە بەرگریش بێت لە مافی خۆیان دەبێت بە ئاگاداری و رەزامەندی حکومەتی عێراق بێت
ئەمەش لە کاتێکدایە، نزیکەی هەفتەیەک دەبێت وەزارەتی بەرگری تورکیا دەستپێکی ئۆپەراسیۆنێکی نوێی سەربازی بەناوی کلیل -چنگ لەناو خاکی هەرێمی کوردستاندا بۆ سەر ناوچەکانی چیای مەتینا و ئاڤاشین و هەرێمی زاپ راگەیاندووە، بەڵام تا ئێستا هیچ کام لە سێ سەرۆکایەتیەکەی هەرێم هیچ راگەیەندراوێکیان لەو بارەیەوە نەبووە.