فەرماندەیەکی حەشدی شەعبی وەڵامی هێرشە ئاسمانییەکەی دوێنێی دەوڵەتی تورکی بۆ سەر بارەگاکانی حەشدی شەعبی لە موسڵ دایەوە و جەخت دەکاتەوە، کە بەئامانجگرتنی بارەگای حەشد لەلایەن تورکیاوە “بێ وەڵام نابێت”، دەشڵێت: هەبوونی حەشد لە موسڵ دڕکە لە چاوی ئەردۆغاندا.
ئاوێنه: شەداد تەمیمی، فەرماندەی حەشدی شەعبیی لەبارەی هێرشەکەی دوێنێی دەوڵەتی تورک بۆ سەر بارەگایەکی حەشدی شەعبی لە موسڵ بە ڕۆژنیوزی ڕاگەیاند: تورکیا لە درێژەی پێشێلکارییەکانیدا بارەگای حەشدی بۆردوومان کردووە، حەشد لەسەر ئەوە بێدەنگ نابێت و لە دژی هەر کەسێک هێرش بکاتە سەر وڵات بە شێوەیەکی یاسایی هەڵسوکەوت دەکات.
وتیشی:”بێدەنگیی حکومەت لە هێرشەکانی ئەمریکا و تورکیا وایکردووە هاوڵاتیانی مەدەنیی و بارەگای سەربازیی حکومیی بکرێت ئامانج، کە ئەمە کارێکی بێ وێنەیە”.
فەرماندەکەی حەشدی شەعبی دەشڵێت کە “بوونی حەشدی شەعبی لە موسڵ دڕکێکە لە چاوی ئەردۆغان” و وتیشی: لە هەولێر و بەغدا ئەکتەری سیاسیی هەن کە زانیاریی لەبارەی بارەگاکانی حەشد لە موسڵ و ناوچەکانی دیکە تر دەدەنە هەواڵگریی تورکیا.
وتیشی:”دەستدرێژییەکانی تورکیا لەسەر پێگەی حەشدی شەعبی کاریگەری خراپی دەبێت لەسەر پەیوەندییەکانی نێوان بەغدا و ئەنقەرە، پێویستە حکومەتیش بەشێوازی جۆراوجۆر وەڵامی تورکیا بداتەوە”.
ئەوەش لەکاتێکدایە بەرەبەیانی دوێنێ ٢٦ی نیسان فڕۆکەی بێ فڕۆکەوانی دەوڵەتی تورک لە سنووری موسڵ بۆردوومانی بارەگایەکی حەشدی شەعبییان لە سنووری بەعشیقە کرد.