یەكێتی: بەمزوانە ئەنجامی لێكۆڵینەوەكان لە كوشتنی زەكی چەلەبی بڵاودەكرێنەوە
  2022-05-21       497       

ئەمین بابەشێخ، لێپرسراوی مەکتەبی پەیوەندییەکانی یەكێتی ڕایگەیاند، کوشتنی زەکی چەلەبی کەیسێکی جددییە بەلای حکومەتی سلێمانی و حکومەتی هەرێمی کوردستانەوە و ئاشکراشی دەکات، بەمزوانە لایەنە پەیوەندیدارەکان ئەنجامی لێکۆڵینەوەکان لەبارەی کوشتنی زەکی چەلەبی بڵاودەکەنەوە.

ئاوێنە: ئەمڕۆ شەممە، وەفدێكی پارتی دیموکراتی گەلان(هەدەپە) لە سلێمانی لەگەڵ وەفدێکی یەکێتیی نیشتمانیی کوردستان بە سەرۆکایەتیی ئەمین بابەشێخ، لێپرسراوی مەکتەبی پەیوەندییەکانی یەكێنی کۆبونەوە.

دوا کۆبونەوەکە ئەمین بابەشێخ، لێپرسراوی مەکتەبی پەیوەندییەکانی یەكێتی لە لێدوانێكدا بە رۆژنامەنوسانی راگەیاند، لە کۆبونەوەکەدا باسی چەندین بابەتیان کردوە و یەکێک لەو بابەتانە كوشتنی زەکی چەلەبی، خاوەنی رێستۆرانتی دەنیز بوە لە سلێمانی.

وتیشی: کوشتنی ئەم پیاوە حاڵەتێکە پەیوەندیی بە حکومەتەوە هەیە زیاتر، حکومەتی پارێزگای سلێمانی و حکومەتی هەرێمی کوردستانیش ئەم کەیسەیان زۆر بەجددیی وەرگرتوەو لە لێکۆڵینەوەدان.

ئەمین بابەشێخ ئاشکراشیکرد: ئەوەندەی ئێمە تێگەیشتبین بەمنزیکانە ئەنجامی لێکۆڵینەوەکان لەسەر کوشتنی ئەو پیاوە بڵاودەکەنەوە.

لەبارەی ئەگەری هەڵاتنی بکوژانی زەکی چەلەبی بۆ هەولێر، بەرپرسەکەی یەكێتی وتی: ئەو کەسانە لەهەر شوێنێک بن کە خەڵک دەکوژن، بێگومان دەستگیردەکرێن و هەمو هەوڵێک دەدرێت لە هەر شارێکی کوردستان بێت دەستگیربکرێن.

لێپرسراوی مەکتەبی پەیوەندییەکانی یەنەکە باس لەوەش دەکات، کە ئەوان “مەبدەئییەن” لەگەڵ توندوتیژی و کوشتن نین، لەبارەی بۆردومانی ئەمڕۆی سنوری چەمچەماڵیشەوە وتیشی: بەهەمو شێوەیەک دژی توندوتیژیی و تێکدانی ژیانی خەڵکین.

درەنگانێکی شەوی 17ی ئایاری 2022، لە شەقامی بەختیاری شاری سلێمانی ماتۆڕسوارێک کە دو چەکداری دەماکداری لەسەر بو تەقەی لە ڕێستۆرانتی "دەنیز" کرد و بەوهۆیەوە خاوەنی ڕێستۆرانتەکە بە ناوی زەکی چەلەبی کە خەڵکی باکوری کوردستان بەسەختی برینداربو و وێڕای ئەنجامدانی دو نەشتەرگەری بۆی، رۆژی دواتر لە نەخۆشخانە گیانی لەدەستدا.  

زۆرترین بینراو
© 2022 Awene Online, Inc. All Rights Reserved.
×