پارتى و یه‌كێتی راگه‌یه‌ندراوێكی هاوبەشیان بڵاوكرده‌وه‌
  2022-05-25       418       

پارتى و یه‌كێتی راگه‌یه‌ندراوێكیان بڵاوكرده‌وه‌ و رایانگه‌یاند، ئه‌مڕۆ له‌ سه‌رۆكایه‌تیى هه‌رێمى كوردستان كۆبونه‌ته‌وه‌ و ڕاشكاوانه‌ په‌یوه‌ندییه‌كانى هه‌ردولا و دۆخى ئێستاى عێراق و هه‌رێمى كوردستان و زه‌مینه‌ى هاریكاریى هاوبه‌ش و كارى پێكه‌وه‌یى، تاوتوێ كراو بڕیاریاندا كه‌ بۆ ئه‌م مه‌به‌سته‌ كۆبونه‌وه‌ هاوبه‌شه‌كانى هه‌ردو مه‌كته‌بى سیاسیى پارتى و یه‌كێتى وه‌ك پره‌نسیپى كارى پێكه‌وه‌یى به‌رده‌وام بن.

ئاوێنه‌: له‌ راگه‌یه‌ندراوی هاوبه‌شی پارتی و یه‌كێتیدا هاتوه‌، ئه‌مڕۆ له‌ سه‌رۆكایه‌تی هه‌رێمی كوردستان كۆبونه‌ته‌وه‌ و له‌ كۆبونه‌وه‌كه‌دا ڕاشكاوانه‌ په‌یوه‌ندییه‌كانى هه‌ردوولا و دۆخى ئێستاى عیراق و هه‌رێمى كوردستان و زه‌مینه‌ى هاریكاریى هاوبه‌ش و كارى پێكه‌وه‌یى، تاوتوێ كرا.

ئاماژه‌ به‌وه‌شكراوه‌، هه‌ردولا جه‌ختیان كرده‌وه‌ كه‌ دواى ده‌ستپێشخه‌رى و سه‌ردانى نێچیرڤان بارزانى، سه‌رۆكى هه‌رێمى كوردستان بۆ سلێمانى، زه‌مینه‌یه‌كى له‌بار بۆ گفتوگۆ و ئاساییكردنه‌وه‌ و په‌ره‌پێدانى په‌یوه‌ندییه‌كانى نێوان هه‌ردولا و كاركردن بۆ گێڕانه‌وه‌ى متمانه‌ى نێوان هه‌ردولا و هاریكاریى نێوان لایه‌نه‌ سیاسییه‌كان له‌ ڕێگه‌ى لێكگه‌یشتن و گفتوگۆوه‌، هاتووه‌ته‌ ئاراوه‌.

له‌راگه‌یه‌ندراوه‌كه‌دا هاتوه‌، هه‌ردولا بڕیاریاندا كه‌ بۆ ئه‌م مه‌به‌سته‌ كۆبونه‌وه‌ هاوبه‌شه‌كانى هه‌ردو مه‌كته‌بى سیاسیى پارتى و یه‌كێتى وه‌ك پره‌نسیپى كارى پێكه‌وه‌یى به‌رده‌وام بن، هه‌روه‌ها لیژنه‌یه‌كى هاوبه‌شى مه‌كته‌بى سیاسیى هه‌ردولا بێت بۆ گفتوگۆكردن له‌سه‌ر پرۆسه‌ى هه‌ڵبژاردنى داهاتووى په‌رله‌مانى كوردستان.

ئه‌وه‌ش خراوه‌ته‌ڕو، له‌ ته‌وه‌رێكى دیكه‌ى كۆبونه‌وه‌كه‌دا جه‌ختیان له‌ هاوكارى و پاڵپشتیى هه‌ردولا بۆ حكوومه‌تى هه‌رێمى كورستان و داموده‌زگا شه‌رعییه‌كانى و به‌رده‌وامیى ڕاگرتنى هه‌ڵمه‌تى ڕاگه‌یاندنى دژ به‌ یه‌كتر كرده‌وه‌.

زۆرترین بینراو
© 2022 Awene Online, Inc. All Rights Reserved.
×