جێگری یەكەمی سەرۆكی پەرلەمانی عێراق بەهۆی گرتنەوەی ئاو لە وڵاتەكەی هۆشداری دەداتە توركیاو ئێران و دەڵێت، ئەگەر مافی عێراق لە ئاو دابین نەكەن ئەوا ئاڵوگۆڕی بازرگانی لەگەڵ هەردو وڵات رادەگرن.
حاكم زاملی، جێگری یەكەمی سەرۆكی پەرلەمانی عێراق، ئەمڕۆ(پێنجشەممە)، لە كۆنگرەیەكی رۆژنامەوانیدا رایگەیاند، ئێران رێڕەوی چوار روباری گۆڕیوەو رێژەی ئەو ئاوەی لەو وڵاتەوە دەگات گەیشتۆتە سفر و هەروەها توركیاش كەمتر لەسەدا 20ی ئاوی بەرەو عێراق بەرداوەتەوە، ئەوەش نەك لەبەر خۆشەویستی عێراق بەڵكو لەپێناو بەرهەمهێنانی كارەبا لە بەنداوی ئیلیسۆ.
زاملی وتی، رەنگە پەرلەمانی عێراقی هیچ رێگەیەكی لەبەردەمدا نەبێت بۆ وەڵامدانەوەی ئەو دو وڵاتە دراوسێیە جگە لەوەی پەنابەرێتە بەر دەركردنی یاسایەك بۆ بە تاوان دانانی مامەڵەو ئاڵوگۆڕی بازرگانی لە توركیاو ئێران.
بەپێی قسەی حاكم زاملی، قەبارەی بازرگانی عێراق لەگەڵ توركیا ساڵانە دەگاتە 20 ملیار دۆلارو لەگەڵ ئێرانیش دەگاتە 16 ملیار دۆلارو وتیشی"ئەوەش لەكاتێكدا كە عێراق تەنها هاوردە دەكات لەو دو وڵاتەوەو هیچی بۆ هەناردە ناكات."