پاش ئەوەی لەسەر فەرمانی موقتەدا سەدر، رێبەری رەوتی سەدر، پەرلەمانتارانی رەوتەکە دەستیان لەکارکێشایەوە، مەسعود بارزانی، سەرۆکی پارتی دیموکراتی کوردستان رایگەیاند، "رێز لە بڕیارەکەی سەدر دەگرین."
ئاوێنە: ئەمرۆ دووشەممە 13ـی 6ـی 2022، مەسعود بارزانی لە تویتێکدا لە هەژماری فەرمی خۆی لە تویتەر لەبارەی بڕیارەکەی سەدر و کشانەوەی لە پەرلەمان ئاماژەی بەوەکردووە، "رێز لە بڕیارەکەی سەماحەتی بەڕێز موقتەدا سەدر دەگرین و چاودێری بەرەوپێشچوونەکانی داهاتوو دەکەین."
پاش ئەوەی لە کۆتایی هەفتەی رابردوو موقتەدا سەدر داواى لە پەرلەمانتارانى رەوتەکەى کرد وەک ئامادەکارییەک بۆ کشانەوەیان لە پێکهێنانی حکومەت، نامەى دەستلەکارکێشانەوەیان لە پەرلەمان واژۆ بکەن، دوای رۆژێکیش پەرلەمانتارەکان فەرمانەکەی سەدریان جێبەجێکرد. دواتر رۆژی یەکشەممەم محەمەد حەلبوسی سەرۆکی پەرلەمان دەستلەکارکێشانەوەی سەرجەم ئەندامەکانی پەسەندکرد.
هاوکات، ماوەی 8 مانگە هەڵبژاردنی پەرلەمانی عیراق کراوە، بەڵام هێشتا حکومەت پێکنەهێندراوە، پەککەوتنی پرۆسەی سیاسییش بەهۆی ناکۆکیی لایەنەکانەوەیە لەسەر هەڵبژاردنی سەرۆک کۆمار و سەرۆک وەزیران.