عەلی حەمە ساڵح ئەندامی پەرلەمانی كوردستان دەڵێت، نەك 60 ملیار دینار بەڵكو هیچ بڕە پارەیەك بۆ رێگای كەلار - دەربەندیخان دابین نەكراوە و تەنها بڕیارە و دەبێت سلێمانی خۆی دابینی بكات.
ئاوێنە: ئەو پەرلەمانتارە لە بەدواداچوونێكدا بڵاویكردووەتەوە، لە چەند رۆژی رابردودا وەزیر و بەرپرسانی حكومەت رایانگەیاند كە بڕی 60 ملیار دینار بۆ رێگای كەلار- دەربەندیخان بە بڕیاری ئەنجومەنی وەزیران تەرخانكراوە.
هێمای بۆ ئەوەش كردووە، ئەمە بڕیاری خەرجكردنەو دەبێت لە داهاتی سلێمانی خۆی پارەكە دابین بكرێت، لە سلێمانی دەڵێن هەموو تەركیزیان لەسەر دابینكردنی موچەیە و پارە بۆ پرۆژە نییە، دەیان پرۆژەی دیكە لە سلێمانی و گەرمیان و رانیەو هەڵەبجە و سەرجەم قەزاو ناحیەكان لە ئەنجومەنی وەزیران بڕیاریان لێدراوە و دەبێت لە داهاتی سلێمانی بێت، لە سلێمانی دەڵێن داهات نییە و هەمووی راگیراوە.
عەلی حەمە ساڵح جەختی لەوەش كردووەتەوە، لە ئێستادا سەرجەم پرۆژەكانی هەڵەبجە و گەرمیان و سلێمانی و راپەڕین ڕاگیراون، جگە لە 100 مەتری سلێمانی كە زۆر بەهێواشی كاری تێدا دەكرێت و وەك ئەوەیە ئەویش راگیرابێت.