سەرۆکی هاوپەیمانی دەوڵەتی یاسا ڕایدەگەیەنێت، بۆردوومانە بەردەوامەکانی تورکیا و بەئامانجگرتنی هاوڵاتیانی مەدەنیی زیانی گەورە بە پەیوەندییەکانی تورکیا و عێراق دەگەیەنێت، داواش لە حکومەتی عێراق دەکات، پێداچوونەوە بە هەڵوێستەکانیدا بکات و کاربکات بۆ ڕاگرتنی هێرشەکانی تورکیا.
ئاوێنه: نووری مالیکی، سەرۆکی هاوپەیمانی دەوڵەتی یاسا کەمێک پێش ئێستا تویتێکی لەسەر هێرشەکانی دەوڵەتی تورک بۆ سەر خاکی عێراق بڵاوکردووەتەوە و دەڵێت: دەستدرێژیکردنە سەر سەروەریی عێراق لەلایەن هیچ وڵاتێکەوە قبوڵ ناکرێت و دەبێت حکومەت ڕێوشوێن بگرێتەبەر بۆ ڕاگرتنی.
جەختیش دەکاتەوە، کە دووبارەبوونەوەی پێشێلکارییەکانی تورکیا بۆ سەر خاکی عێراق لە هەرێمی کوردستان و شەهید و بریندارکردنی هاوڵاتییانی مەدەنیی “زیانی زۆر گەورە بە پەیوەندییەکانی نێوان عێراق و تورکیا دەگەیەنێت”.
مالیکی لەسەر هێرشە دووبارەبووەکانی دەوڵەتی تورکیش داوا لە حکومەتی عێراق دەکات: پێداچوونەوە بە هەڵوێستی خۆیدا بکات و کاربکات بۆ ڕێگریکردن لەو پێشێلکارییانە.