چوارچێوەی هەماهەنگی لە كۆبونەوەی ئەمڕۆیاندا تاوتوێی گفتوگۆكانی نێوان هێزە نیشتمانییەكانیان بۆ پێكهێنانی حكومەت كردوەو لیژنەیەكی دانوستانیشیان بۆ گفتوگۆ لەگەڵ هێزە نیشتمانییەكان پێكهێناوە.
ئاوێنە: چوارچێوەی هەماهەنگی لە بەیاننامەیەكدا رایگەیاند، ئەمڕۆ پێنجشەممە كۆبونەوەیەكی ئاسایی خۆیان بۆ تاوتوێكردنی چەند پرسێكی ئەمنی و سیاسی گرێداوە.
بەپێی بەیاننامەكە، لە بڕگەی یەكەمی كۆبونەوەكەیاندا، میوانداری مستەفا كازمی، سەرۆك وەزیرانی عێراقیان كردوە بۆ تاوتوێكردنی چەند پرسێك لەوانە: پرسی ئەمنی و پێشێلكارییەكانی توركیا، شەڕی دژی تیرۆرو هەروەها پرسی بەشداری عێراق لە كۆنگرەی ریاز بۆ وزە.
لە بڕگەی دوەمی كۆبونەوەكەشدا بەپێی بەیاننامەكە، تاوتوێی پرسە سیاسییەكان كراوەو بەشدارانی كۆبونەوەكە تاوتوێی گفتوگۆی نێوان هێزە نیشتمانییەكانیان بۆ پێكهێنانی حكومەت كردوەو هەروەها چوارچێوەی هەماهەنگی لیژنەیەكی دانوستانی پێكهێناوە بۆ گفتوگۆ لەگەڵ هێزە نیشتمانییەكان.