وەزارەتی سامانە سروشتییەكان رایگەیاند، ئەمڕۆ(سێشەممە) لە كۆبونەوەیەكی فراواندا بە سەرپەرشتی وەزیری سامانە سروشتییەكان بڕیاردرا كە دابینكردنی بەنزین بەنرخی پاڵپشتیكراو بەردەوام بێت.

ئاوێنە: بەپێی راگەیەندراوێكی وەزارەتەكە، ئەمڕۆ كەمال محەمەد ساڵح، وەزیری كارەبا و وەزیری سامانە سروشتییەكان سەرپەرشتی كۆبونەوەیەكی فراوانی كردو "لەو كۆبونەوەیەدا كە بەڕێوەبەرانی نەوت و كانزاكانی پارێزگاكانی كوردستان ئامادەیبون، بڕیاردرا رۆژانە  3 بۆ 3.5 ملیۆن لیتر بەنزین دابین بکرێت بە كوالێتی و مواسەفاتێكی باش."

هەروەها لە راگەیەندراوەكەدا هاتوە"تەوەرێکی کۆبونەوەکە تایبەت بو بە پاڵپشتیكردنی كەرتی گواستنەوەی گشتی بۆ ئەم مەبەستە وەزارەت بەنرخێکی پاڵپشتیکراو بەردەوام دەبێت بۆ دابینکردنی بەنزینی 690 دیناری."

هەروەها ئەوەش خراوەتەڕو"لەو کۆبونەوەیەدا وەزیری سامانە سروشتیەکان سوپاسی ئەنجومەنی وەزیرانی کرد كە لەماوەی 4 رۆژی رابردوودا 9 ملیۆن لیتر بەنزینی بەشێوەیەكی دادپەروەرانە بەسەر پارێزگاکانی کوردستاندا دابینكردوەو رۆڵی لەكۆنترۆڵكردنی نرخی بەنزین هەبو."

هەروەك بەپێی راگەیەندراوەكە، بۆ ڕوبەڕوبونەوەی خراپی کوالێتی بەنزینیش وەزیری سامانە سروشتیەکان داوای لە لیژنەی باڵای چاودێری و بەدواداچونی كوالێتی و مواسەفاتی بەنزین کرد هەوڵەکانیان چڕبکەنەوەو دەستنیشان و سزای توندی هەر بەنزینخانەیەکیش بکەن کە بەدەر لە ڕێنماییەکانی وەزارەت سەرپێچی دەکەن.