لە كۆبونەوەی ئەمڕۆی ئەنجومەنی وەزیراندا، مەسرور بارزانی، سەرۆكی حكومەتی هەرێم وەزارەت و بەرپرسانی حکومەتی ڕاسپارد، هاوکاری زیاتری دەزگاکانی ڕاگەیاندن بکەن و ئاسانکاری پێویستیان پێشکەش بکەن و قوباد تاڵەبانی، جێگری سەرۆكی حكومەتیش پێشنیاری كرد یاسای مافی دەسکەوتنی زانیاری لە هەرێمی کوردستان كارابكرێت.
ئاوێنە: ئەمڕۆ چوارشەممە 22 ی حوزەیرانی 2022 ، بە سەرپەرشتی مەسرور بارزانی سەرۆکی ئەنجومەنی وەزیران و ئامادەبونی قوباد تاڵەبانی جێگری سەرۆکی ئەنجومەن، ئەنجومەنی وەزیرانی هەرێمی کوردستان کۆبوەوە.
بەپێی راگەیەندراوێكی حكومەتی هەرێم، "لە دەستپێکی کۆبونەوەکەدا، سەرۆک وەزیران ئاماژەی بە دیدارەکەی لە گەڵ دەزگاکانی ڕاگەیاندنی کوردستان دا و لەمبارەیەوە وەزارەت و بەرپرسانی حکومەتی ڕاسپارد، هاوکاری زیاتری دەزگاکانی ڕاگەیاندن بکەن و ئاسانکاری پێویستیان پێشکەش بکەن و زیاتر زانیاری و ڕونکردنەوە دەربارەی کار وچالاکییەکانی حکومەت بە دەزگاکانی ڕاگەیاندن و ڕای گشتی کوردستان بگەیەنن، ئەمەش بەشێکە لە کارنامەی حکومەت لە ڕوی شەفافیەت و ئاگادارکردنەوەی ڕای گشتی."
هەر بەگوێرەی راگەیەندراوەكە "قوباد تاڵەبانی جێگری سەرۆکی ئەنجومەنی وەزیران، سەرەڕای پشتگیریکردنی لە وتەکانی سەرۆکی ئەنجومەنی وەزیران، پێشنیاری کاراکردنی یاسای مافی دەسکەوتنی زانیاری لە هەرێمی کوردستان ژمارە 11 ساڵی 2013 کرد، ئەویش لە ڕێگەی دەرکردنی ڕێنمایی ئاسانکاریی جێبەجێکردنی یاساکە لە لایەن ئەنجومەنی وەزیرانەوە، بۆ ئەوەی بە شێوەیەکی سیستماتیک، بابەتی پێدانی زانیاریی دروست، بە ڕۆژنامەنوسان و هاوڵاتیيان ڕێک بخرێتەوە."
لە راگەیەندراوەكەدا هاتوە"لە بڕگەی یەکەمی کۆبونەوەکەدا، سامان بەرزنجی وەزیری تەندروستی ڕاپۆرتێکی بەرفراوانی دەربارەی ڕێکارەکانی وەزارەتی تەندروستی و وەزارەتە پەیوەندیدارەکان بۆ ڕێگریکردن لە تەشەنەکردنی نەخۆشیەکانی سکچونی توند و پەتای کۆلێراو کۆنتڕۆڵکردنیان خستەڕو کە تیایدا بە ئامار و شیکاری، هۆکارەکانی سەرهەڵدانی پەتاکە و ئامادەکاریی و ڕێکار و وەڵامدانەوەی وەزارەتەکەی خستەڕو."
بەپێی راگەیەندراوەكە، ئەنجومەنی وەزیران، پێشنیارەکانی ڕاپۆرتەکەی وەزیری تەندروستی پەسەند کردو وەزارەت و لایەنە پەیوەندیدارەکانی ڕاسپارد بۆ بەردەوامبون لە سەر ڕێکارەکانی ڕێگەگرتن لە تەشەنەکردنی ئەم پەتایەو چارەسەرکردنی سەرچاوە و هۆکاری نەخۆشیەکە، بە تایبەتی پاكکردنەوەی سەرچاوەکانی ئاو و هوشیارکردنەوەی هاوڵاتیيان لەمبارەیەوە.
پاشان لەلایەن کەمال محەمەد ساڵح وەزیری سامانە سروشتییەکان بەوەکالەت، دەرەنجامی بڕیاری کۆبونەوەی پێشوی ئەنجومەنی وەزیران سەبارەت بە کێشەی بەنزین خرایەڕو. سەرۆک وەزیران وەزارەتی سامانە سروشتییەکانی راسپارد کە "بەردەوامبن لە سەر ئەو ڕێکارانە بۆ زیادکردنی بەرهەمهێنانی ناوخۆ و کۆنترۆلکردنی نرخی سوتەمەنی."
هەروەها ئەنجومەنی وەزیران، جەختی کردەوە لە "بەردەوامبون لەسەر پلان و بەرنامەی چاکسازیی کابینەکە کە بەشێکی گرنگ و سەرەکی بەرنامەی کاری کابینەکەیە."
لە راگەیەندراوەكەدا هاتوە"لە بڕگەیەکی دیکەی کۆبونەوە، ئەنجومەنی وەزیران ڕاسپاردە و پێشنیارەکانی وەزارەت و لایەنە پەیوەندیدارەکانی پەسەند کرد تایبەت بە درێژکردنەوەی ماوەی کارکردن بە بڕیاری پێشوی ئەنجومەنی وەزیران ژمارە 140 و داڕشتنەوەی بڕیاری ژمارە 145 تایبەت بە ئاسانکاریی بۆ دابینکردنی پێداویستییە خۆراکییە سەرەکییەکان، تاکو بارگرانی نەبونی بەرهەمە خۆراکیەکان یان گرانبونیان لە سەر هاوڵاتییان دروست نەبێت، ئەویش بە بەردەوامبونی هەڵگرتنی ڕەسمی گومرگی لە سەر بەرهەم و پێداویستییە خۆراکییە سەرەکییەکان تا 2022/9/30"
بەپێی راگەیەندراوەكە لە بڕگەی کۆتاییدا، ئامانج ڕەحیم سکرتێری ئەنجومەنی وەزیران، ڕاپۆرتێکی خستەڕو سەبارەت بە پێویستی و گرنگی بەردەوامبونی پرۆسەی وردبینی و پێداچونەوەی سەرجەم قۆناغەکانی پرۆسەکانی نەوت و گاز لە هەرێمی کوردستان و برەودان بە شەفافیەت لە ڕێگای بەردەوامی خستنەبەردەستی ڕاپۆرتەکانی تایبەت بە زانیاری و ژمارەکانی بەرهەمهێنان و هەناردەکردن و فرۆشتن و خەرجیی و داهاتی نەوت وگاز بۆ ڕای گشتی."