ئەحمەد حاجی رەشید، پەرلەمانتاری خولی پێشوی پەرلەمانی عێراق لە كۆمەڵی دادگەری، دەڵێت، بەبڕوای من بەبێ رەوتی سەدر، هیچ حکومەتێک لە عێراق سەرکەوتو نابێت بۆیە باشترین چارەسەر هەڵوەشاندنەوەی پەرلەمان و ئەنجامدانی هەڵبژاردنی پێشوەختە.
ئاوێنە: ئەحمەد حاجی رەشید، ئێوارەی ئەمڕۆ چوارشەممە، لەلاپەڕەی خۆی لە فەیسبوك نوسیویەتی"سبەی پێنجشەممە ۷۳ پەرلەمانتاری جێگرەوە سوێندی یاسایی دەخۆن و قەرار وایە پاش ئەوە ڕێکارەکانی هەڵبژاردنی سەرۆک کۆمارو پێکهێنانی حکومەت دەست پێبکات."
وتوشیەتی"بەبڕوای من هیچ حکومەتێک سەرکەوتو نابێت لە غیابی رەوتی سەدر، هەربۆیە بەبڕوای من پەرلەمان و حکومەتی ئایندەش شەرعیەتی ۳۲٪ دەنگدەرانیان لەدەستداوە."
ئەحمەد حاجی رەشید ئەوەشی خستۆتەڕو"بۆیە باشترین و ساناترین و بێ کێشەترین چارەسەر ئەوەیە چوارچێوەی هەماهەنگی و هاوپەیمانەکانی هەوڵی هەمواری یاسای هەڵبژاردن بدەن لەبەر ڕۆشنایی ڕاسپاردەی دادگای فیدڕاڵی و بڕیاری هەڵوەشاندنەوەی پەرلەمان و هەڵبژاردنی پێشوەخت بدرێت."