بەڕێوەبەرایەتی بەرگریی شارستانیی سۆران ئاشكرایكرد، ئەمڕۆ(چوارشەممە) ژنێکی تەمەن 43 ساڵ لە کاتی رزگارکردنی منداڵەکەیدا، لە روباری چۆمان خنکاوە، بەڵام منداڵەكەی رزگاركراوە.
ئاوێنە: بەڕێوەبەرایەتیەكە، كەمێك لەمەوبەرە لە راگەیەندراوێكدا وتی، ئەمرۆ چوارشەممە کاتژمێر (6:41)ی ئێوارە ئاگادار کراینەوە بە بونى روداوێکى خنکان لە روبارى چۆمان نزیک پردى حافیز، دەستبەجێ تیمى ئامادەباشى بنکەى بەرگرى شارستانى خانەقا دەرچون بۆ شوێنى روداو.
ئەوەشی خستۆتەڕوو، بەپێى راپۆرتى بنکەى ناوبراو بەرلەوەى بگەنە شوێنى روداو تەرمى قوربانیەکە لەلایەن هاوڵاتیانەوە کە ئامادەییان هەبوە لەم شوێنە، دەرهێندراوە.
ئاماژەی بەوەشداوە كە، خنکاوەکە ئافرەتە بە رەگەز عەرەبە، ناوى (فظا على ناصر)ە، لە دایکبوى ساڵى (1979)یەو دانیشتوى رانیەیە، بەمەبەستى گەشت و سەیران لەگەڵ كەسوكارەكەی روى لەم ناوچەیە کردبو.
بەرگری شارستانی سۆران ئاشكراشیكردوە، هۆکارى روداوەکە منداڵەکەى بوە کە کەوتۆتە ناو روبارو ئەویش بەمەبەستى رزگارکردنى بەدوایدا خۆى فرێ داوەو خنکاوە، منداڵەکەشى رزگار کراوە .
بەپێی راگەیەندراوەكە، لەسەرەتای ئەمساڵەوە تاکو ئێستا حەوت هاوڵاتی لەروبارەکانی سنوری سۆران خنکاون.