به‌وته‌ی سەرکردەیه‌كی چوارچێوەی هەماهەنگی شیعه‌كان، په‌رله‌مانتاره‌كانیان واژۆ كۆده‌كه‌نه‌وه، بۆ ئەوەی رێگریی لەمستەفا کازمی بکەن لەکۆنگرەی ریاز نەتوانێت واژۆ لەسەر هیچ رێککەوتن‌و پەیماننامەیەك بکات.
ئاوێنه: محەمەد بەلداوی، سەرکردە لەچوارچێوەی هەماهەنگی ئاشکرایکرد، تاوەکو ئێستا پەرلەمانتارەکانیان زیاتر 50 واژۆیان کۆکردووەتەوە، بۆ ئەوەی رێگری لەمستەفا کازمی، سەرۆك وەزیرانی کاربەڕێکەری عێراق بکەن، لەکۆنگرەی ریاز نەتوانێت واژۆ لەسەر هیچ رێککەوتن و پەیماننامەیەك بکات.
بەوتەی بەلداوی، پەرلەمانتارەکان بەنوسراوێکی فەرمی واژۆکانیان ئاراستەی سەرۆکی ئەنجومەنی نوێنەرانی عێراق کردووەو تێیدا داوا دەکەن، بەپێی دەستورو بڕیاری دادگای باڵای فیدراڵی ژمارە 121 دەرچو لەساڵی 2022، لەواژۆکردنی هەموو رێککەوتن و پەیماننامەیەك لەکۆنگرەی ریاز لەسعودیە، دەسەڵاتەکانی کازمی سڕ بکرێت.
دوێنێ پێنجشه‌ممه لەپەرلەمانی عێراق سوێندخواردنی یاسایی بەکۆمەڵی پەرلەمانتارانی جێگرەوەی پەرلەمانتارە دەستلەکارکێشاوەکانی فراکسیۆنی سەدر بەڕێوەچو. بەوەش رێگە لەبەردەم چوارچێوەی هاوئاهەنگی کرایەوە کە وەکو گەورەترین فراکسیۆن مامەڵە بکات.