بڕیارە پەرلەمانی كوردستان رۆژی دوشەممە كۆببێتەوەو لە دانیشتنەكەدا دەنگ لەسەر پێشنیازەیاسای گەشتوگوزار بدات و خوێندنەوەی یەكەم بۆ دو پێشنیازەیاساو خوێندنەوەی دوەمیش بۆ سێ پێشنیازو پڕۆژەیاسا بكات.

ئاوێنە: بەپێی راگەیەندراوێكی پەرلەمانی كوردستان، بڕیارە دانیشتنەكە كاتژمێر 10 بەیانیی رۆژی دوشەممە رێكەوتنی 27/6/2022 بەڕێوەبچێت.

لە راگەیەندراوەكەدا هاتوە، دەستەی سەرۆکایەتیی پەرلەمانی کوردستان بڕیاریدا به‌رنامه‌ی كاری دانیشتنی ڕۆژی دوشەممە  ٢٠٢٢/٦/٢٧ به‌م شێوه‌یه‌ بێت:

یەكەم: دەنگدان لەسەر پێشنیازەیاسای (گەشتوگوزار لە هەرێمی كوردستان-عێراق) به‌پێی حوكمی مادده‌كانی (٩٠، ٩١، ٩٣، ٩٦) له‌ په‌یڕه‌وی ناوخۆی په‌رله‌مانی كوردستان.

دوەم: خوێندنەوەی یەكەم بۆ ئەم پێشنیازەیاسایانەی خوارەوە، بەپێی حوكمی ماددەی (٧٩، ٨٠) لە پەیڕەوی ناوخۆی پەرلەمانی كوردستان:

١ - پێشنیازەیاسای (سەندیكاى خاوەن پیشە تەندروستییەكانی هەرێمی كوردستان-عێراق).

٢ - پێشنیازەیاساكانی (پاراستنی ئاژەڵان لە هەرێمی كوردستان-عێراق) و (پاراستنی مافی ئاژەڵان).

سێیەم: خوێندنه‌وه‌ی دوه‌م بۆ ئەم پێشنیاز و پڕۆژەیاسایانەی خوارەوە، به‌پێی حوكمی مادده‌كانی (٨٧، ٨٨، ٨٩، ٩٧) له‌ په‌یڕه‌وی ناوخۆی په‌رله‌مانی كوردستان.

١ - پێشنیازەیاسای (بەركاركردنی یاسای فیدڕالی واژۆی ئەلیكتڕۆنی و مامەڵەی ئەلیكتڕۆنییەكان ژمارە (٧٨)ی ساڵی ٢٠١٢ لە هەرێمی كوردستان-عێراق).

٢ - پڕۆژەیاسای (هەمواری یەكەمی یاسای نەوت و گاز لە هەرێمی كوردستان-عێراق).

٣ - پڕۆژەیاسای (هەمواری یەكەمی یاسای پاراستن و چاككردنی ژینگە لە هەرێمی كوردستان-عێراق ژمارە (٨)ی ساڵی ٢٠٠٨).