رەمەزان نامیق، سەرۆكی لیژنەی پلان و پڕۆژەكان لە ئەنجومەنی پارێزگای سلێمانی رایگەیاند، زیادەڕەوییەكانی سەر پڕۆژەی شەقامی 100 مەتری سلێمانی هۆكارێكی سەرەكین لەبەردەم تەواونەكردنی پڕۆژەكەو خاوەندارێتی زیادەڕەوییەكانیش دەگەڕێتەوە بۆ كەسانی دەسەڵاتدارو بەرپرس و بەوهۆیەشەوە كاركردن لە چەند شوێنێكی شەقامەكە راگیراوە.
ئاوێنە: رەمەزان نامیق، ئەمڕۆ شەممە، لە راگەیەندراوێكدا وتویەتی"ئەنجومەنی وەزیران ڕەزامەندی دەربڕیوە بەدابینکردن و تەرخانکردنی شایستە داراییەکانی شەقامی 100 مەتری لەسەر داهاتی بەڕێوەبەرایەتی هاتوچۆی سلێمانی."
ئەوەشی خستۆتەڕو"ئێستا کاتی ئەوەیە سەرجەم زیادەڕەوییەکانی سەرشەقامەکە لاببرێن کە هۆکارێکی سەرەکین لەبەردەم تەواونەکردنی پڕۆژەکە، ئەگەر پارەی نەختینەش هەبێت بەڵام زیادەڕەوییەکان لانەبرێن ناتوانرێت پڕۆژەکە تەواوبکرێت."
ئاشكراشیكردوە"خاوەندارێتی زیادەڕەوییەکان دەگەڕێتەوە بۆ کەسی دەسەڵاتدارو بەرپرس و ڕێگرن لەوەی زیادەڕەوییەکان لاببرێن و بەم هۆیەوە لەچەند شوێنێکی ڕێگاکە کارکردن تیایدا ڕاگیڕاوە."
جەختیشی كردۆتەوە كە "بەپێی یاسای ژمارە (۳) ساڵی (۲۰۱۸) ئەرکی لایەنی پەیوەندیدارە ئەم زیادەڕەوییانە لاببەن و لەکاتی لانەبردنی زیادەڕەوییەکان ڕوبەڕوی دادگایان بکەنەوە."