د. دارا رەشید، وەزیری پلاندانانی هەرێم رایگەیاند، بە هەماهەنگی لەگەڵ وەزارەتی كارو كاروباری كۆمەڵایەتی و رێكخراوی كاری جیهانی دو پڕۆژە یاسامان ئامادەكردون كە لە رێگەیانەوە رێژەی بێكاری كەمتر دەبێتەوەو هەمو ئەوانەشی لە كەرتی تایبەت كاردەكەن هاوشێوەی كەرتی حكومی خانەنشین دەكرێن.
ئاوێنە: بەپێی راگەیەندراوێكی وەزارەتی پلاندانان، ئەو وتانەی د. دارا رەشید، ئەمڕۆ دوشەممە، لەمیانی بەخشینی بڕوانامەی کۆتایی هاتنی خولی میکانیکی بۆ فێرکردن و ڕاهێنان و پەرەپێدانی لێهاتویی تواناکانی گەنجان لەبواری ئۆتۆمبێلدا هاتون کە لەلایەن رێكخراوی یوئێن دی پی و کۆمپانیای تۆیۆتا لە عێراق و هەرێمی کوردستان رێکخرابو.
بەپێی راگەیەندراوەكە وەزیری پلاندانان وتوشیەتی"یەکێک لە هەنگاوەکانی حکومەت کارئاسانی و پاڵپشتیکردنی کەرتی تایبەتە بۆ ئەوەی گەنجان روو لەکەرتی تایبەت بکەن."
هەروەها د.دارا ڕەشید راشیگەیاندوە"دو پرۆژە یاسامان ئامادەکردوە بەهەماهەنگی لەگەڵ وەزارەتی کاروکاروباری کۆمەڵایەتی و رێکخراوی کاری جیهانی (ILO) ئەوانیش بریتین لە یاسای دەستەبەری کۆمەڵایەتی و خانەنشینی کەرتی تایبەت و یاسای کاری وەزارەتی کاروکاروباری کۆمەڵایەتی کە لەو رێگەیەوە رێژەی بێکاری کەمتر دەبێتەوە و خزمەتێکی گەورە بە کرێکاران و هەمو ئەوانە دەکات کە لەکەرتی تایبەت کار دەکەن تاوەکو هاوشێوەی کەرتی حکومی خانەنشین بکرێن لەچوارچێوەی دەستەبەری ماف و داخوازیەکانیان لەکەرتی تایبەت هاوشێوەی کەرتی گشتی (حکومی)."