کونسوڵی گشتی ئەمەریکا لە هەرێمى کوردستان رایگەیاند، وڵاتەکەى هەزاران پێشمەرگەی ئازای لەژێر کۆنترۆڵی لایەنە سیاسیەکانەوە گواستەوە بۆ ژێر دەسەڵاتی وەزارەتی پێشمەرگەو لە پێناو سەلامەتی هەرێمی کوردستاندا، هەڵساون بە بەهێزکردنی توانای هێزە ئەمنیەکان و هێزەکانی جێبەجێکردنی یاساو چالاکانەش پشتیوانی ئەو رۆژنامەنوسانەیان کردوە کە روبەڕوی پێشێلکاری ئازادی راگەیاندن بونەتەوە.
ئاوێنە: رۆبێرت پاڵەدینۆ، کونسوڵی گشتی ئەمەریکا لە هەرێمى کوردستان، بەبۆنەى تەواوبونى ئەرکەکانى لە هەرێمى کوردستان لە نامەیەکى تایبەتدا کە بۆ "ئێن ئاڕ تى" نێردراوە بەناونیشانى "ئەمەریکا و هەرێمی کوردستان بەیەکەوە باشترن" دەڵێت، زۆر کاریان کردوە لەو ماوەیەى لێرە بون. پرۆسەی دیموکراسی درێژ و زەحمەتە، بەڵام ویلایەتە یەکگرتوەکانی ئەمەریکا شان بە شانتان دەوەستێت.
لەبەشێکى دیکەى نامەکەیدا نوسیویەتى، پەیوەندی نێوان ئەمەریکا و هەرێمی کوردستان بەهێزە، بەڵام بۆئەوەی ئەو پەیوەندیە بەهێزتر بکەن، پێویست دەکات بەیەکەوە کاربکەن بۆ بەرەوپێشبردنی بەها هاوبەشەکانی وەک ئازادی رادەربڕین، چاکسازی ئابوری و یەکگرتویی کورد.
وەک کونسوڵی گشتی ئەمەریکا لە هەرێمى کوردستان دەڵێت، ئەوەی گرنگە کونسوڵخانە زۆر زیاتری کردوە وەک تەنها کۆبونەوە لەگەڵ بەرپرسانی حکومی و پارتە سیاسیەکان و بەڵکو هەوڵی زۆریان خستوەتەگەڕ بۆ بینینی هاوڵاتی ئاساییش و یارمەتی پەرواێزخراوەکانیان داوەو زۆرجاریش هەوڵیانداوە ببینە دەنگی بێدەنگەکان.
لەبەشێکى دیکەى نامەکەیدا ڕۆبێرت پاڵەدینۆ دەڵێت دروستترین سەلمێنەری هاوڕێیەتیەکەیان بریتیە لە پەیوەندی نێوان هاوڵاتیەکانیانى نێوان ئەمریکا و کوردستان و دەشڵێت، دوای وەستانێکی زۆر کونسوڵخانەی گشتی ئەمەریکا دەستی بە خزمەتگوزاری پێدانی ڤیزە کردەوە، چونکە دەیانەوێت خەڵکی هەرێمی کوردستان ببینین کە دەخوێنن و گەشت دەکەن و بازرگانی دەکەن لە ئەمەریکا.