ڕاوێژکاری سەرۆکی هەرێمی کوردستان رایگەیاند، کۆبونەوەی لیژنەی نوێنەری حزبەکان بەردەوام دەبێت تا دەگەنە ڕێککەوتن لەبارەی هەڵبژاردنی پەرلەمانی كوردستان، دواتر ڕاپۆرتێک ئامادە دەکەن و ئاراستەی سەرۆکایەتیی هەرێمی کوردستان دەکرێت بۆ ئەوەی ڕێککەوتنی کۆتایی لە نێوان لایەنەکاندا بکرێت لەبارەی هەڵبژاردن و کۆمسیۆن .
ئاێنە: زیرەک کەمال، راوێژكاری سەرۆكی هەرێمی كوردستان، ئەمڕۆ پێنجشەممە، بە ماڵپەڕی فەرمیی پارتی دیموکراتی کوردستانی راگەیاند: "گفتوگۆی نێوان لایەنەکان بەردەوامە و لە لایەن حزبەکانەوە لیژنە دروست کراوە تا ئێستا چەندین کۆبونەوەی کردوە و بەردەوامیش دەبێت تا کارەکانیان تەواو دەکەن و دواتر دەیکەنە ڕاپۆرتێک و ئاراستەی سەرۆکایەتیی هەرێمی دەکەن، بۆ ئەوەی ڕێککەوتنی لەسەر بکرێت.''
زیرەك کەمال باسی لەوەش کرد: بەربەستی ئەوەی تا ئێستا نەگەیشتونەتە ڕێککەوتن هەندێک ناکۆکی هەیە لەسەر شێوازی هەڵبژاردن و کۆمسیۆن و چۆنیەتیی ئەنجامدانی هەڵبژاردن و بۆچونی جیاواز هەیە و دەکرێت لە داهاتودا بگەنە ڕێککەوتن، هەر بۆیەش سەرۆکایەتیی هەرێم لەگەڵ لایەنەکان کۆنەبوەتەوە و تا ئێستا لەبارەی وادەی هەڵبژاردنیش ڕێککەوتن نییە، چونکە پێویستە لایەنەکان بگەنە ڕێککەوتن ئەوکات هەڵبژاردن بۆ کاتێکی دیاریکراو دوا دەخرێت کە سەرۆکی هەرێم بڕیاری لێ دەدات.