ئەمڕۆ سێشەممە، بەسەرپەرشتی قوباد تاڵەبانی، جێگری سەرۆكی حكومەت ئەنجومەنی راژەی فەرمانبەرانی حكومەتی هەرێم كۆبوەوەو تێیدا پەیكەری ئەنجومەنەكە پەسەندكراو جەخت كرایەوە كە لە رێگەی ئەو ئەنجومەنەوە فەرمانبەران بەسەر وەزارەت و دامودەزگاكاندا دابەش بكرێنەوە.
ئاوێنە: بەپێی راگەیەندراوێكی حكومەتی هەرێم، ئەمڕۆ، قوباد تاڵەبانی، جێگری سەرۆكی حكومەت سە‌رپە‌رشتی كۆبونە‌وە‌یە‌كی كرد كە تایبە‌ت بو بە ئەنجومەنی راژەی فەرمانبەرانی حكومەتی ھەرێم و تێیدا پەیکەری ئەنجومەنەکە پەسەند کرا.
بەگوێرەی راگەیەندراوەكە، لە‌كۆبونە‌وە‌كە‌دا، ھە‌ریە‌كە لە رێباز حە‌ملان یاریدە‌دە‌ری سەرۆكی حكومەت بۆ کاروباری ئەنجومەنی باڵای وەبەرھێنان و ئەنجومەنی گشتی راژە و دكتۆر ئومێد سە‌باح سەرۆكی دیوانی سە‌رۆكایە‌تی ئەنجومەنی وە‌زیران ئامادە‌ی بون، هەڵسەنگاندن کرا بۆ بڕیارەکانی کۆبونەوەی پێشو لەگەڵ جێبەجێکردنی بڕیار و راسپاردەکانی.
لە راگەیەندراوەكەدا هاتوە"هاوکات گفتوگۆ كرا لەبارەی چۆنییە‌تی کارو رۆڵی ئەنجومەنی گشتی راژەو رێکخستنەوەی میلاکات، ئاماژە بەوەشکرا کە یەکێک لەئامانجەکانی ئەم ئەنجومەنە پەرەپێدانی ژێرخانی حکومەتە لە‌پرسی رێکخستنەوەی میلاکات و درێژەپێدانی ریفۆرمی ئیداریی و رێکخستنی پلەبەندی راژەی فەرمانبەران لە کەرتی گشتی بە پێی پێویستی و پسپۆڕییان و دیاری کردنی پلە و وەسفی وەزیفی فەرمانبەران لەناو دامەزراوەکانی حکومەت پشت بەست بە میلاكاتی ئە‌لكترۆنی کە بڕیارە دروستبکرێت."
بەگوێرەی راگەیەندراوەكە ھە‌روە‌ھا لە‌كۆبونە‌وە‌دا جە‌ختكرایە‌وە کە "لەڕێی ئەنجومەنی راژەوە کاربکرێت لەسەر چۆنییە‌تی راگرتنی ھاوسە‌نگی كارگێڕی و رێکخستنەوەی ھە‌یكە‌لیە‌ت و دوبارە دابەشکردنەوەی فەرمانبەران بەسەر وەزارەت و دامودەزگاکانی حکومەتی هەرێمی کوردستان بە شێوەیەکی زانستی و گونجاوتر."
ئاماژە بەوەشدراوە كە "هەر لەکۆبونەوەکەدا هەیکەلیەتی ئەنجومەنی راژە پەسەند کرا و بڕیاردرا کەدەست بکرێ بەپڕکردنەوەی پەیکەرەکە لەچوارچێوەی یاسای چاکسازی دا."