وەزارەتی پێشمەرگە، رایگەیاند، ئێوارەی ئەمڕۆ چوارشەممە، وەفدێكی عێراق گەیشتۆتە فڕۆكەخانەی هەولێر لەلایەن سەرۆك ئەركانی وەزارەتی پێشمەرگەوە پێشوازی لێكراوە، بڕیارە هەر ئەمڕۆ وەفدی هاوبەش سەردانی ئەو ناوچەیە لە زاخۆ بكەن كە بەر بۆردومانەكانی توركیا كەوتوە.
ئاوێنە: وەزارەتی پێشمەرگە، كەمێكە لەمەوبەر لە راگەیەندراوێكدا وتی"ئەمڕۆ ئێوارە ٢٠ی تەمووزی ٢٠٢٢، فەریق روکن عیسا عوزێر سەرۆکی ئەرکانی وەزارەتی پێشمەرگە، لە فڕۆکەخانەی نێودەوڵەتی هەولێر پێشوازی کرد لە شاندێکی باڵای حکومەتی عێراقی، کە پێکهاتبوون لە د. فواد حسێن وەزیری دەرەوەی عێراق و فەریقی یەکەمی روکن عەبدولئەمیر شەمەری جێگری فەرماندەی ئۆپەراسیۆنە هاوبەشەکانی عێراق و شاندێکی یاوەریان."
ئەوەشی خستۆتەڕو"وابڕیارە، هەر ئەمڕۆ شاندی هاوبەش سەردانی ئیدارەی زاخۆ و ئەو ناوچەیە بکەن، کە بەر بۆردومانەکان کەوتووە و بەهۆیەوە ژمارەیەک هاوڵاتی سڤیل شەهید و بریندار بوون، بۆئەوەی لەنزیکەوە زیانە گیانی و مادییەکانی ناوچەکە ببینن و ئاگاداری روداوەکە بن."