بارەگای بارزانی بەتوندی ئیدانەی تۆپبارانكردنی ناوچەیەكی گەشتیاریی سنوری زاخۆ دەكات لەلایەن هێزەكانی توركیاوەو دەشڵێت، شەهیدو برینداركردنی هاوڵاتیانی سڤیل لە لایەن هەر هێز و لایەنێك بێت تاوانەو قابیلی قبوڵ نییە.
ئاوێنە: بارەگای بارزانی، ئەمڕۆ(چوارشەممە)، لە راگەیەندراوێكدا وتی"بە داخێكی زۆرەوە ئەمڕۆ بەپێی ئەو زانیارییانەی كە گەییشتون، بەهۆی تۆپبارانكردنی هێزەكانی توركیا بۆ سەر ناوچەی گەشتیاریی پەرەخێ لە سنوری زاخۆ ژمارەیەك هاوڵاتیی بێتاوان شەهید و ژمارەیەكی تریش بریندار بون."
ئەوەشی خستۆتەڕو"وێڕای ئەوەی زۆر بەتوندی ئیدانەی ئەو تاوانە دەكەین، سەرەخۆشی لە خانەوادە و كەسوكاری شەهیدانی ئەو ڕوداوە دڵتەزێنە دەكەین و هیوای چاكبونەوە بۆ برینداران دەخوازین."
بارەگای بارزانی جەختی كردۆتەوە كە "شەهید و برینداركردنی هاوڵاتیانی سڤیل و بێتاوان لە لایەن هەر هێز و لایەنێك بێت و لەژێر هەر بیانو و پاساوێكدا بێت، تاوانەو قابیلی قبوڵ نییە. پێویستیشە سنورێك دابنرێت كە ڕوداوی هاوشێوە دوبارە نەبنەوەو چیتر هاوڵاتیانی ئێمە نەبنە قوربانیی ململانێی و شەڕی نێوان هێزو لایەنی تر."
ئەوەشی وتوە"كاتی ئەوە هاتوە كە حكومەتی هەرێم و حكومەتی فیدڕاڵی بە هەماهەنگی لەگەڵ یەكتر چارەسەرێكی جددی و بنەڕەتی بۆ ئەو هۆکارانە بدۆزنەوە کە دەبنە هۆی ڕودانی ئەم تاوان و کارەساتانە."
دەقی راگەیەندراوەكە:
ڕاگەیێندراوێك لە بارەگای بارزانی
بەناوی خودای بەخشندە و میهرەبان
بە داخێكی زۆرەوە ئەمڕۆ بەپێی ئەو زانیارییانەی كە گەییشتون، بەهۆی تۆپبارانكردنی هێزەكانی توركیا بۆسەر ناوچەی گەشتیاریی پەرەخێ لە سنوری زاخۆ ژمارەیەك هاوڵاتیی بێتاوان شەهید و ژمارەیەكی تریش بریندار بون. وێڕای ئەوەی زۆر بە توندی ئیدانەی ئەو تاوانە دەكەین، سەرەخۆشی لە خانەوادە و كەسوكاری شەهیدانی ئەو ڕوداوە دڵتەزێنە دەكەین و هیوای چاكبونەوە بۆ برینداران دەخوازین.
ڕاشیدەگەیێنین شەهید و برینداركردنی هاوڵاتیانی سڤیل و بێتاوان لە لایەن هەر هێز و لایەنێك بێت و لەژێر هەر بیانو و پاساوێكدا بێت، تاوانە و قابیلی قبوڵ نییە. پێویستیشە سنورێك دابنرێت كە ڕوداوی هاوشێوە دوبارە نەبنەوە و چیتر هاوڵاتیانی ئێمە نەبنە قوربانیی ململانێی و شەڕی نێوان هێز و لایەنی تر. كاتی ئەوە هاتوە كە حكومەتی هەرێم و حكومەتی فیدڕاڵی بە هەماهەنگی لەگەڵ یەكتر چارەسەرێكی جددی و بنەڕەتی بۆ ئەو هۆکارانە بدۆزنەوە کە دەبنە هۆی ڕودانی ئەم تاوان و کارەساتانە.
بارەگای بارزانی
٢٠ـی تەمموزی ٢٠٢٢