نێردەی نەتەوە یەكگرتوەكان لە عێراق رایگەیاند، بەتوندی ئیدانەی ئەو تۆپبارانە دەكەن كە ئەمڕۆ لە سنوری زاخۆ بوە هۆی كوژران و برینداربونی ژمارەیەك هاوڵاتی مەدەنی.
ئاوێنە: نێردەی نەتەوە یەکگرتوەکان بۆ هاریکاریی عێراق (یونامی) لە راگەیەندراوێكدا وتی، بە توندی ئیدانەی ئەو تۆپبارانە کوشندەیەی ئەمڕۆ دەکەین لە زاخۆی سەر بە پارێزگای دهۆك لە هەرێمی کوردستان، کە بەپێی زانیارییەکان ٨ هاوڵاتی مەدەنی کوژراون و ٢٣ کەسی دیکەش برینداربون.
ئەوەشی خستۆتەڕو"جارێکیتر خەڵکی مەدەنی دەکەونە ژێر کارگەریی تۆپبارانکردنی کوێرانە. بەپێی یاسا نێودەوڵەتییەکان نابێت هێرشەکان ئاراستەی خەڵکی مەدەنی بکرێت. بۆیە یونامی داوای لێکۆڵینەوەی ورد دەکات بۆ دیاریکردنی بارودۆخ و هۆکاری هێرشەکە، هەروەها جەخت لەوە دەکاتەوە کە دەبێت لە هەمو کاتێکدا رێز لە سەروەری و یەکپارچەیی خاکی کۆماری عێراق بگیرێت."
ئاماژەی بەوەشداوە كە یونامی داوا لە هەمو لایەنەکان دەکات کە دەستبەجێ ئەم پێشێلکاریانە ڕابگرن.