ئەدھەم بارزانی، سەرۆکی پێشووی ئەنجومەنی سەرکردایەتی پارتی لە سلێمانی و ئامۆزای مەسعود بارزانی ڕایگەیاند، ڕێگری لێدەکرێت بگەڕێتەوە هەرێمی کوردستان و دەشڵێت، ئەگەر هەر ڕێگری لێبکرێت ناچار دەبێت بگەڕێتەوە شوێنێکی دیکەی وڵات.
ئاوێنە: ئەدهەم بارزانی لە لێدوانێكی رۆژنامەوانیدا رایگەیاند"لە ئێستادا هەرێمی کوردستانم جێهێشتوە و لە ڕۆژهەڵاتی کوردستانم، ڕێگری لە گەڕانەوەم بۆ ھەرێمی کوردستان دەکرێت."
ئاماژەی بەوەشکردوە، "ئەگەر بەرپرسانی ھەرێم لەسەر ھەمان بیڕوڕایان بەردەوام بن و ڕێگری لە گەڕانەوەم بکەن، ناچار دەبم بگەرێمەوە شوێنێکی دیکەی وڵات، پلانی ئەوەم ھەیە بچمە شاری بەغداو لەوێوە بەردەوام بم لە کارەکانم و بارەگای خۆم بنیاد بنێم و پەیوەندیە سیاسییەکانم بەردەوامی پێبدەم".
ئەدهەم بارزانی ڕونیشیکردەوە، "ئەو کاتەی ڕێگری لە گەڕانەوەم کرا لەسەر سنور، بەرپرسانی باڵای ھەرێمم ئاگادار کردەوە، لە ئێستاشدا چاوەڕێی ھەنگاو و وەڵامی ئەوانم و تا ئێستا ھیچیان نەوتوە نە بەباش و نە بە خراپە."