ناوەندی ڕاگەیاندن‌و چاپەمەنی هێزەکانی پاراستنی گەل -هەپەگە- ڕایده‌گەیه‌نێت كه گەریلاکانیان لەتۆڵەی قوربانییانی هێرشه‌كه‌ی گوندی په‌رخی سنوری زاخۆ چالاکییان ئەنجامداوەو لەئەنجامدا چوار سەربازی تورکیا کوژراون‌و فڕۆکەیەکی بێ فڕۆکەوانیش تێکشکێندراوە.
ئاوێنه: ئەمڕۆ یه‌كشه‌ممه، ناوەندی ڕاگەیاندن‌و چاپەمەنی هەپەگە ڕاگەیەندراوێکی بڵاوکردەوەو تێیدا ئەوەی خستووەتەڕو، "گەریلاکان بۆ تۆڵەی قوربانییانەی کۆمەڵکوژییەکەی دەوڵەتی تورک لەزاخۆ، چالاکییان دژی سوپای تورک ئەنجامداوە."
هەپەگە دەڵێت، "هێزەکانی گەریلا بەناوی ‘برایەتیی گەلان‌‌و بۆ تۆڵەی ئەو نۆ کەسە بێتاوانەی لەزاخۆ لەلایەن دەوڵەتی داگیرکەری تورکەوە شەهیدکران، زنجیرەیەک چالاکییان ئەنجامداوە، لەئەنجامی چالاکییەکانی تیمەکانی گەڕۆکاماندا؛ لانیکەم چوار داگیرکەر سزادران و داگیرکەرێکیش بریندار بو."
راشیگه‌یاندووه، "گەریلاکان لەچالاکییەکانیاندا دو سەنگەر، درۆنێک‌و کامێرایەکی چاودێریی سوپای تورکیایان تێکشکاندووەو گورز لەئۆتۆمبێڵێکی زرێپۆشیش وەشێندراوە."
هەپەگە ئاماژەی بەوەشکردووە، کە سوپای توركیا پێنج جار بەچەکی کیمیایی‌و تەقەمەنی، ١١ جار بەفڕۆکەی شەڕ، ٣٣ جار بەهەلیکۆپتەری جەنگیی، دەیان جاریش بەچەکی قورس، هاوەن‌و تۆپ گۆڕەپانەکانی بەرخۆدانی بۆردومان‌و تۆپباران کردووە.
رۆژی 20ـی ئه‌م مانگه، به‌هۆی تۆپبارانكردنی ناوچه‌یه‌كی گه‌شتیاری گوندی په‌ره‌خ له‌ئیداره‌ی سه‌ربه‌خۆی زاخۆ، نۆ كه‌س شه‌هیدبون‌و 29 كه‌سی دیكه‌ش برینداربون، روداوه‌كه‌ش كاردانه‌وه‌ی ناوخۆیی‌و نێوده‌وڵه‌تی لێكه‌وته‌وه.