بافڵ تاڵه‌بانی سه‌رۆكی یه‌كێتیی نیشتمانیی كوردستان له دیدارێكدا له‌گه‌ڵ سه‌رۆكی كۆمه‌ڵی دادگه‌ریی كوردستان باسیان له دواین په‌ره‌سه‌ندنه سیاسییه‌كان و پرسی پێكھێنانی حكومه‌تی نوێی عێراق كرد.
ئاوێنه: به‌گوێره‌ی راگه‌یه‌ندراوێكی نوسینگه‌ی راگه‌یاندنی سه‌رۆكی یه‌كێتی، بافڵ تاڵه‌بانی، سه‌رۆكی یه‌كێتیی نیشتمانیی كوردستان له ماڵی مام له به‌غدا پێشوازیكرد له مامۆستا عه‌لی باپیر، سه‌رۆكی كۆمه‌ڵی دادگه‌ریی كوردستان، له دیدارێكدا دوایین په‌ره‌سه‌ندنه سیاسییه‌كان و پرسی پێكھێنانی حكومه‌تی نوێی عێراق گفتوگۆیان له‌باره‌وه‌كرا و جه‌خت له چاره‌سه‌ركردنی سیاسییانه‌ی كێشه‌كان و كۆتاییهێنان به‌ناكۆكییه‌كان كرایه‌وه.
بافڵ تاڵه‌بانی جه‌ختی له یه‌كهه‌ڵوێستی و په‌ره‌پێدانی په‌یوه‌ندییه‌كانی نێوان یه‌كێتیی نیشتمانیی كوردستان و كۆمه‌ڵی دادگه‌ری كرده‌وه به‌شێوه‌یه‌ك كه هه‌ردولا هاوكار و هه‌ماهه‌نگ بن له‌پێناو سه‌رخستنی پرۆسه‌ی چاكسازی له هه‌رێمی كوردستان و خزمه‌تكردنی زیاتری خه‌ڵك.
له‌به‌رامبه‌ردا عه‌لی باپیر خۆشحاڵی خۆی ده‌ربڕی بۆ ئه‌و رۆڵه گرنگه‌ی یه‌كێتیی نیشتمانیی كوردستان له به‌غدا ده‌یگێڕێت كه درێژه‌پێده‌ری سیاسه‌تی حه‌كیمانه‌ی سه‌رۆك مامجه‌لاله و ئێستاش ماڵه‌كه‌ی كۆكه‌ره‌وه‌ی هێز و لایه‌نه سیاسییه‌كانی عێراقه.