موقتەدا سەدر، رێبەری رەوتی سەدر داوا لە لایەنگران و جەماوەری چوارچێوەی هەماهەنگی دەكات پشتیوانی لە خۆپیشاندانەكانی ئەوان بكەن كە بۆ پشتیوانی چاكسازییە نەك بۆ پشتیوانیكردنی شكۆی دەوڵەت و ئەو حكومەتانەی كە هیچ سودێكیان بۆ عێراق نەبوە.
ئاوێنە: موقتەدا سەدر، ئەمڕۆ(هەینی)، لە پەیامێكدا بۆ لایەنگران و جەماوەری چوارچێوەی هەماهەنگی رایگەیاند"ئێمەو جەماوەی چوارچێوەی هەماهەنگی بۆچونمان جیاواز نییە لەوەدا كە گەندەڵی هەیەو لە وڵاتدا بڵاوبۆتەوە، لەو روەوە ناكۆكیمان لەگەڵ سەركردەكانیاندایە."
وتوشیەتی"ئەی جەماوەی چوارچێوەی هەماهەنگی، بەرەی چاكسازی لە خۆپیشاندانەكانیدا لەپێناو ئێوەشدا خۆپیشاندان دەكات. زۆر سەیرە كە ئێوە پشتیوانیمان لێ نەكەن لەپێناو رزگاركردنی نیشتمان كە بۆتە دیلی داگیركاری و تیرۆرو گەندەڵی."
ئاماژەی بەوەشداوە "با خۆپیشاندانەكانتان بۆ پشتیوانی چاكسازی بێت نەك بۆ پشتیوانیكردنی شكۆی دەوڵەت و ئەو حكومەتانەی كە هیچ سودێكیان نەبو بۆ عێراق."
سەدر وتوشیەتی"ئایا ئێوە شكۆ و ئازادی و ئاسایش و قوت و سەلامەتی و چاكسازیتان ناوێ وەك ئەوەی ئێمە داوای دەكەین؟"
ئەوەشی خستۆتەڕو"ئەگەر بڕیارتان داوە هاوكات لەگەڵ خۆپیشاندانەكانی چاكسازیدا، خۆپیشاندان بكەن...با خۆپیشاندانەكانتان ئاشتیانە بن و پارێزگاری لە ئاشتی كۆمەڵایەتی بكەن."
وتوشیەتی"ئەی جەماوەی چوارچێوەی هەماهەنگی ئێمە دەستمان بۆ ئێوە درێژدەكەین بەبێ سەركردەكانتان... با هەوڵی چاككردنی ئەو شتانە بدەین كە گەندەڵ كراون."
ئەوەشی خستۆتەڕو"ئەگەر ئەمەش رەتدەكەنەوە ئەوا ئێمە هەر بەردەوام دەبین لەسەر چاكسازی... سڵاو بۆ ئەوانەی شوێن چاكسازی دەكەون."