موهەنەد موسەوی، وتارخوێنی نوێژی هەینی سەدرییەكان ئەمڕۆ لەمیانی پێشكەشكردنی وتاری نوێژی هەینی یەكگرتودا لە ناوچەی سەوزی بەغدا رایگەیاند، پاشەكشێ لە فەرهەنگی "ئەم شۆڕشە"دا نییەو "شۆڕشەكە" دۆخی سیاسی داهاتوی عێراق دیاری دەكات.
ئاوێنە: موهەنەد موسەوی لە وتارەكەیدا رایگەیاند، "ئەم شۆڕشە تیشكێكی ئومێدەو دەرفەتێكە بۆ رزگاركردنی عێراق لە گەندەڵی و راستكردنەوەی رێڕەوی پڕۆسەی سیاسی."
جەختیشی كردەوە كە "پاشەكشێ لە فەرهەنگی ئەم شۆڕشەدا نییە." و "شۆڕشگێڕەكان بەردەوام دەبن تا هاتنەدی داواكارییەكان و بەهیچ شێوەیەك سازش لەسەر داواكارییەكانیان ناكەن، چونكە ئەمە دوا دەرفەتیانە."
ئەوەشی خستەڕو "ئەم شۆڕشە دۆخی سیاسی داهاتوی عێراق دیاری دەكات ئەوەش لە رێگەی پڕۆسەیەكی دیموكراتیی شۆڕشگێڕانەی ئاشتیخوازانەوەو دواتر ئەنجامدانی هەڵبژاردنی پێشوەخت لەدوای هەڵوەشاندنەوەی پەرلەمان."
وتاربێژی نوێژی هەینی یەكگرتو جەختیشی كردەوە كە خۆپیشاندەرانی لایەنگری سەدر بەردەوام دەبن لە مانگرتنەكەیان تا ئەو كاتەی داواكارییەكانیان دێنەدی.