مستەفا كازمی، سەرۆك وەزیرانی عێراق رایگەیاند، سبەی چوارشەممە، لە دەستپێشخەرییەكی بانگهێشتی سەرجەم سەركردەكانی وڵات دەكات بۆ گفتوگۆیەكی نیشتمانی و دەشڵیت، داخرانی سیاسی رەنگدانەوەی هەبوە لەسەر كارەكانی حكومەت و جەختیش دەكاتەوە كە حكومەتەكەی لە ناكۆكییە سیاسییەكاندا لایەندار نییە.
ئاوێنە: بەپێی راگەیەندراوێكی نوسینگەكەی، ئەمڕۆ سێشەممە، مستەفا كازمی لە میانی كۆبونەوەی ئەنجومەنی وەزیراندا رایگەیاند، هێشتا لەنێو ئاڵنگارییە سیاسییەكاندا و داخرانی سیاسی دەژن كە رەنگدانەوەی لەسەر كارەكانی حكومەت هەبوە.
ئەوەشی خستۆتەڕو، حكومەت لایەندار نییە لە ناكۆكییە سیاسییەكاندا بەڵام هەندێك هەوڵی ئەوە دەدەن بەرپرسیارێتی قەیرنەكە بخەنە ئەستۆی حكومەت و لە كێشەكە هەڵبێن و هەمو كێشەكان بخەنە پاڵ حكومەت.
سەرۆك وەزیرانی عێراق جەختیشی كردۆتەوە كە بڕیارمان لەم حكومەتەدا ئەوە بوە كە دەستمان نەچێتە خوێنی هیچ عێراقییەك نە ئەمڕۆ و نە سبەی، خوێنی عێراقییەكان بەنرخەو كێشەكان دەبێت بە گفتوگۆ چارەسەر بكرێن.
ئاشكراشیكردوە، سبەینێ سەرجەم سەركردەكانی وڵات بانگهێشت دەكەم بۆ گفتوگۆیەكی نیشتمانی لەپێناو بەشداریكردن لە دۆزینەوەی چارەسەرێك و بیركردنەوە لە چارەسەری كێشەكە.
ئاماژەی بەوەشداوە كە حكومەت بەبێ بودجە ناتوانێت بژی، دو ساڵە بەبێ بودجەیە.
هەروەها وتوشیەتی، داخرانی سیاسی رەنگدانەوەی لەسەر پێكهێنانی حكومەت و نەبونی بودجە هەبوە.