شەقامی 100 مەتری سلێمانی 46%ی تەواو بووە
  2022-10-04       584       


پڕۆژەی شەقامی ١٠٠ مەتریی سلێمانی، بە تۆڕی شەقامە لاوەكییەكانیەوە درێژییەكەی ١٤٥ كیلۆمەترە و بە سێ قۆناغ جێبەجێ دەكرێت. قۆناغی یەكەمی پڕۆژەكە بڕی ٤٠٠ ملیار دینار بۆ ئەم پرۆژەیە تەرخانكراوە و لەماوەی كاركردنیدا ٦٠٠ ئامێر كاری تێدا كردووە و زیاتر لە ١٠٠٠ هەلی كاری راستەوخۆی ڕەخساندووە.

ئاوێنه‌: ئەبوبەكر تەیب، بەڕێوەبەری پرۆژەی شەقامی ١٠٠ مەتریی سلێمانی لە سەرۆكایەتیی شارەوانی سلێمانی بە ماڵپەڕی حكومەتی هەرێمی كوردستانی ڕاگەیاندووە، قۆناغی یەكەمی پڕۆژەكە ٣٤ كیلۆمەتر درێژە، لە شارۆچكەی تاسڵوجەوە دەستپێدەكات تا گوندی دەمركان و ٤٦٪ـی كارەكانی تەواو بووە.

حكومەتی هەرێمی كوردستان، دەیەوێت بە جێبەجێكردنی ئەم پرۆژەیە، كێشەی قەرەباڵغی و جەنجاڵیی شەقامەكانی سلێمانی چارەسەر بكات و لە پێناو كەمكردنەوەی ڕووداوەكانی هاتووچۆ و سووتانی بەنزینی كەمتر لەناو شار و پاراستنی ژینگە ئاسانكاریی تەواو بۆ شۆفێران بكات.

بەڕێوەبەری پڕۆژەكە وتیشی، “شەقامەكە 4 سایدی هاتن و چوونە و پانییەكەشی ١٠٠ مەترە، هەروەها ٥ ئەندەرپاس، ٧ یەكتربڕ و ٣ پردی پەپوولەیی لەخۆ دەگرێت. جگە لەوەی لەسەر چەمی تاسڵوجە، پردێك دروست دەكرێت، كە درێژییەكەی ٥٠٠ مەترە و ٢٠ ملیۆن دۆلاری تێدەچێت.

ئەبوبەكر تەیب، سەبارەت بە دابینكردنی كارەبا و تۆڕی ئاو بۆ شەقامە، ئاشكرای كرد، قۆناغی یەكەمی پڕۆژەكە، ٦٧ ئاوباری كۆنكرێتی بۆ پەڕینەوەی ئاوی باراناو لەخۆدەگرێت، كە درێژایی هەر یەكێكیان ١١٠ مەترە، هەروەها تۆڕێكی كارەبای مۆدێرنی بۆ ڕووناككردنەوەی تەواوی شەقامەكە تێیدایە.

بە تەواوبوونی ئەم قۆناغەی پڕۆژەكە، قەرەباڵغی و جەنجاڵیی بەشێك لە شەقامەكانی سلێمانی كەم دەبێتەوە و هاتووچۆی شۆفێران ئاسانتر دەبێت، هەروەها ئەم ناوچەیە لەڕووی ئابووری و گەشتیارییەوە دەبووژێتەوە.

زۆرترین بینراو
© 2022 Awene Online, Inc. All Rights Reserved.
×