ئەندامێکی سەرکردایەتیی پارتی دەڵێت، بەرلە هەڵبژاردنی سەرۆککۆماری عێراق لەسەر ئەو پرسە هەماهەنگی لەنێوان یەکێتی و پارتیدا هەبوەو کشاندنەوەی كاندیدەكەی پارتی پەیوەندی بەو لێکتێگەیشتنەوە هەبوە کە لەنێوان هەردولادا هەبوە.
ئاوێنە: چنار سەعد عەبدوڵا، ئەندامی سەرکردایەتیی پارتی دیموکراتی کوردستان بە روداوی راگەیاند "بۆ هەڵبژاردنی سەرۆککۆمار جۆرێک لە هەماهەنگی و رێککەوتن لەنێوان یەکێتی و پارتیدا هەبوە، بونی هەماهەنگی و رێککەوتن لەنێوان یەکێتی و پارتی نیشانەی بەهێزیی هەردو حیزبە."
وتیشی، ئەگەر هەماهەنگی لەنێوان یەکێتی و پارتی نەبوایە، ئەوا یەکێتی دو كاندیدی نەدەبو بۆ پۆستی سەرۆککۆمار.
لەبارەی ئەو وتانەی بافڵ تاڵەبانی، سەرۆکی یەكێتیی نیشتمانی کوردستان کە لە دوای پرۆسەی هەڵبژاردنی سەرۆککۆماری عێراق رایگەیاند"كاندیدەكانی پارتیمان شکاند"، ئەندامەکەی سەرکردایەتیی پارتی وتی، لێدوانەکەی سەرۆکی یەکێتی "کاریگەری نەرێنی دەبێت لەسەر پەیوەندییەکانی نێوان هەردولاو هەردو حیزب لە هەرێمی کوردستان هاوبەشن لە حوکمڕانیدا، بەڵام گرنگە ئەوەی رویدا لە دوێنێدا بەجێبهێڵرێت و کاریگەری لەسەر یەکڕیزیی کورد لە بەغدا نەبێت و دەبێت هەمو حیزبەکان لە بەغدا بە یەک هێڵی گشتی کاربکەن کە ئەویش بەرژەوەندییەکانی هەرێمی کوردستان بێت."
چنار سەعد عەبدوڵا وتیشی"پێویستە لایەنە کوردستانییەکان لە بەغدا کار لەسەر پێکهێنانی هاوپەیمانێتییەکی کوردستانی بکەن لە پەرلەمانی عێراق بۆ ئەوەی لەسەر زۆرینەی پرسەکان هاودەنگبن، هەرێمی کوردستان و پارتی ئامادەی هەمو پشتیوانییەکی سەرۆککۆماری نوێی عێراقەو دەخوازن پێکەوە کاربکەن بۆ جێبەجێکردنی داواکارییەکانی هەرێمی کوردستان."