دانا عەبدولکەریم، وەزیری ئاوەدانکردنەوەو نیشتەجێکردنی حكومهتی ههرێمی كوردستان دهڵێت، رێگای دوسایدی کۆیە- ھەولێر رێگایەکی ستراتیژییەو دهبو تا ساڵی 2014 تەواو بکرێت، بەڵام تەواو نەکراوە، لەئێستاشدا بەھۆی بارودۆخی داراییەوە حکومەت ناتوانێت بودجەی پڕۆژەکە دابین بکات کە 360 ملیار دینارە.
ئاوێنه: ئهمڕۆ یهكشهممه دانا عەبدولکەریم پڕۆژەی قیرتاوکردنی گوندەکانی کاولان، گۆمەشین و قزوڵی لەسنوری ناحیەی ئاشتی لەقەزای کۆیە بەسەرکردەوەو لەکۆنگرەیەکی رۆژنامەوانیدا رایگەیاند، "چەند رێگایەکیان بۆ قیرتاو دەکەین کە لەماوەی یەک دو ھەفتەی رابردودا نزیکەی 11 کیلۆمهتر رێگا لە گوندەکانی کاولان و گۆمەشین و قزلو قیرتاوکراوەو کارکردن لە چەند گوندێکی دیکەش بەردەوامە".
سەبارەت بە رێگای دوسایدی کۆیە- ھەولێر، ئاماژهی بهوهكرد، "ئەوە رێگایەکی ستراتیژییە و ھاوکات بەشێکیشە لەدوسایدی ھەولێر- سلێمانی، ئەو پڕۆژەیە لە ساڵی 2011ەوە چوەتە بواری جێبەجێکردنەوەو دەبو تا ساڵی 2014 تەواو بکرێت، بەڵام تەواو نەکراوە، لەئێستاشدا بەھۆی بارودۆخی داراییەوە حکومەت ناتوانێت بودجەی پڕۆژەکە دابین بکات کە 360 ملیار دینارە، بەڵام وەک وەزارەت لە گفتوگۆداین لەگەڵ چەند کۆمپانیایەک بۆ دەستپێکردنەوەی کارکردن لەپڕۆژەکە بەشێوەی قەرزی درێژخایەن".
وەزیری ئاوەدانکردنەوەو نیشتەجێکردن جەختیکردەوە، "لەئایندەیەکی نزیکدا کارکردن لە رێگای دوسایدی دوکان-چوارقوڕنە دەستپێدەکاتەوە، ئەوەش دوای دۆزینەوەی چارەسەر بۆ ئەو گرفتانەی ھەیبوە، راپۆرتی وەزارەت چوەتە ئەنجومەنی وەزیران و ئەوانیش پەسەندیان کردوە".