شاسوار عەبدولواحید، سەرۆكی جوڵانەوەی نەوەی نوێ، ئەمڕۆ پێنجشەممە، پێشوازی كرد لە محەمەد شیاع سودانی، سەرۆك وەزیرانی راسپێردراوی عێراق و دەڵێت، بۆ بەشداریكردنی نەوەی نوێ لە حكومەتی نوێ سەردانی كردبوین، سەرەڕای پشتیوانیمان بۆ ئەو بەرنامە باشەی كە بۆی باسكردین بەڵام ئێمە بڕیارمان دا بەشداری حكومەت نەكەین.
ئاوێنە: شاسوار عەبدولواحید، كەمێك لەمەوبەر لە راگەیەندراوێكدا وتی"ئەمڕۆ پينجشەممە ٢٠٢٢/١٠/٢٠ پێشوازیمان کرد لە سەرۆک وەزیرانی راسپێردراوی عێراق بەرێز (محەمەد شیاع سودانی) کە سەردانی کردبوین تایبەت بە بەشداریکردنی نەوەی نوێ لە حکومەتی نوێی عێراق."
سەرۆكی جوڵانەوەی نەوەی نوێ ئەوەشی خستۆتەڕو"سەرەڕای سوپاس و پشتیوانیمان بۆ هەوڵەکانی بەرێزیان و ئەو بەرنامە باشەی کە بۆی باسکردین، پێمان راگەیاند کە دڵخۆشین بە بیستنی ئەم بەرنامە و روئیایەو بە دڵنیاییەوە پشتیوانی هەمو کارێکی جوان و باش دەبین، ئەگەر خوانەکردە خراپیش بون یان کەموکورتیان هەبو، ئەوا بێگومان رەخنەگرو چاودێر دەبین بەسەریانەوە."
شاسوار عەبدولواحید وتوشیەتی"بەڵام لە راستیدا بە هۆی وەرگرتنی رایەکی زۆری هاوڵاتییان و دەنگدەرانمان، پاش گفتوگۆ لەناوخۆی خۆمان و ناو جوڵانەوەکە و فراکسیۆنەکەو بەهۆی ئەوەی لە ئێستادا دڵنیا نین لەوەی کە ئایا ئێمە بەم وەزاراتانەوە دەتوانین خزمەتی هاوڵاتییان بکەین یاخود نا! بۆیە بڕیارمان دا کە بەشداری حکومەت نەبین و هیچ وەزارەت و پۆستێک وەرناگرین."
هەروەها ئەوەشی وتوە"بەڵام لە دڵەوە هیوادارم ئەم کابینەیە خزمەتی خەڵک بکات و داوام لە بەرێزیان کرد کە هەرچۆن بێت خزمەتی خەڵکی عێراق بە گشتی و خەڵکی هەرێمی کوردستان بکات و گوێمان لێ بگرێت کاتێک داواکاری خەڵکی کوردستان دەگەیەنینە لای و هەوڵی چارەسەرکردنی بدات."