مەحمود سەنگاوی، فەرماندەی سەربازی یەكێتی لەبارەی دۆخی تەندروستی ئاكام عومەر، فەرماندەی هێزەكانی كۆماندۆ كە چوارشەممەی رابردو بەهۆی تەقینەوەی بۆمبەوە لە سنوری پەلكانەو زنانە، برینداربو، رایگەیاند"رەنگە تەندروستی ئاكام زۆر باش نەبێت."

ئاوێنە: مەحمود سەنگاوی، ئەمڕۆ هەینی، لە لێدوانێكدا بۆ رۆژنامەنوسان وتی، ئێستا بەنیازم سەردانی ئاكام عومەر بكەم لە نەخۆشخانە، هیوادارم باش بێت.

هەرلەوبارەیەوە وتیشی"رەنگە تەندروستی ئاكام زۆر باش نەبێت، بەڵام پزیشكەكان هەوڵی خۆیان دەدەن بۆ ئەوەی چارەسەری بكەن."

لەبارەی روداوی تەقینەوەكەش وتی، "داعش لەو ناوچانە هێندەی بۆمبی چێندراو داناوە ڕەنگە تاوەکو 50 ساڵی دیکە هەر بەوشێوەیە بتەقنەوە."  

ئەوەش لەكاتێكدا هەر ئەمڕۆ مستەفا چاوڕەش، لە لێدوانێكدا بۆ رۆژنامەنوسان سەبارەت بە تەندروستی فەرماندەی هێزەكانی كۆماندۆ وتی"تا ئێستا تەندروستی ئاكام عومەر باشە لە نەخۆشخانەیەو لەژێر چاودێریدایە. پزیشكەكانیش باشتر دەزانن."