بە بڕیاری کاربەدەستانی کۆماری ئیسلامی ئێران، ئەمڕۆ چوارشەممە، کە هاوکاتە لەگەڵ چلەی گیان لەدەستدانی ژینا "مەهسا ئەمینی" سەرجەم قوتابخانەو زانکۆکانی سنەو بەشێکی فراوانی رۆژهەڵاتی کوردستان داخران.

ئاوێنە: کاربەدەستانی ئوستانی کوردستان رایانگەینادوە کە "به‌ره‌نگاربونه‌وه‌ی نه‌خۆشییه‌كانی كۆئه‌ندامی هه‌ناسه‌و ئه‌نفلۆنزا" هۆكاری ئه‌م بڕیاره‌یە، بەڵام بەدرێژایی چل ڕۆژی ڕابردو قوتابخانەو زانکۆکان یەکێک بوە لەگرینگترین ناوەندەکانی ناڕەزایەتی لەکۆماری ئیسلامئ ئێران، بەهۆی گیان لەدەستدانی ژیناوە.

ئەم بڕیارە لەکاتێکدایە کە لەسەروەختی چلەی ژینادا، هێزە کوردییەکان‌و گروپە ناڕازییەکان بانگەوازیان بۆ خۆپیشاندان و ناڕەزایەتی دەربڕین کردوە.

ژینا ئەمینی، تەمەن 22 ساڵ‌و کچە کوردی خەڵکی شاری سەقزی رۆژهەڵاتی كوردستان، چل رۆژ لەمەوبەر لە نزیک شاڕێی حەقانی تاران لەلایەن مەفرەزەیەكی پۆلیسی "گەشتی ئیرشاد"ەوە بەتۆمەتی پابەند نەبونی تەواوەتی بەباڵاپۆشی درایە بەر لێدان و دوای دەستگیركردنی گواسترایەوە بۆ نەخۆشخانەو گیانی لەدەست دا.

.

لەدوای گیان لەدەستدان‌و بەخاک سپاردنی خۆپیشاندان‌و ناڕەزایی سەرتاسەری ئێرانی گرتەوەو لەم ناڕەزایەتیانەدا خۆپیشاندەران داوای ڕوخانی کۆماری ئیسلامی و کۆتایی هێنان بەدەسەڵاتی پیاوانی ئایینییان کرد.

رژێمی ئێرانیش بەتوندوتیژیی ڕووبەڕووی خۆپیشاندەران بوەوەو بوە هۆی کوشتن‌و دەستگیرکردنی سەدان کەس، ئەم توندوتیژیی‌و سەرکوتکردنە چەندین جار لەلایەن ڕێکخراوە نێودەوڵەتییەکان و وڵاتانی ڕۆژئاواوە ئیدانە کراوە.