قائیمقامی كۆیە، رایگەیاند، لەسەر سکاڵای کۆمپانیای جێبەجێکاری شەقامی 40 مەتریی کۆیە ناسراو بە شەقامی مام جەلال، فەرمانی دەستگیرکردن بۆ شاسوار عەبدولواحید، سەرۆکی جوڵانەوەی نەوەی نوێ دەرچوە.
ئاوێنە: تاریق حەیدەری، قایمقامی کۆیە بە روداوی راگەیاند: "کۆمپانیای ساکار کە کۆمپانیای جێبەجێکاری پڕۆژەی دو سایدی 40 مەترییە، سکاڵایان لەسەر شاسوار عەبدولواحید کردوەو بەهۆیەوە فەرمانی دەستگیرکردنی بۆ دەرکراوە."
بە وتەی قایمقامی کۆیە، ئەو کۆمپانیا لە رێگەی تەندەرینەوە پڕۆژەکەی بۆ دەرچوە، "بەڵام شاسوار عەبدولواحید بەبێ گەڕانەوە بۆ کۆمپانیاکە ستافی بردوەتە سەر پڕۆژەکەو کاری کردوە، بۆیە کۆمپانیاکەش سکاڵایان لەسەر تۆمارکردوە."
دادگای لێکۆڵینەوەی کۆیە سەر بە سەرۆکایەتی دادگای تێهەڵچونەوەی ناوچەی هەولێر، دوێنێ سێشەممە، لە یاداشتێكی دەستگیركردندا، داوای لە گشت ئەندامانی بەرزەفتی دادوەری و هێزەکانی پۆلیس كردوە، شاسوار عەبدولواحید، سەرۆکی جوڵانەوەی نەوەی نوێ بەپێی ماددەی 240 لە یاسای سزادانی عێراقی دەستگیربکەن و ماڵەكەشی بپشكنن.
لە بڕیارەکەدا هاتوە، "ئێوە رێگەتان پێدراوەو لەسەرتانە ئەم تۆمەتبارەی لە خوارەوە زانیاری لەبارەوە دراوە (شاسوار عەبدولواحید) بیگرن و بیدەن بە دادگاکەمان، چونکە لە بنکەی پۆلیسی باواجی سکاڵای لەسەر تۆمارکراوە."