راكان جبوری، پارێزگاری كەركوك بەوەكالەت رایگەیاند، بەبێ رێكاری یاسایی یاخود تاوەكو ئەنجامدانی هەڵبژاردن، ناكرێت گۆڕانكاریی لە پۆستی پارێزگاری كەركوكدا بكرێت و لە پۆستەكەی لادرێت، چونكە وەك خۆی دەڵێت، من بەشێوەیەكی یاسایی نەك بە رێككەوتنی سیاسی، پارێزگاری كەركوكم.
ئاوێنە: راكان جبوری، شەوی رابردو لە چاوپێكەوتنێكدا لەگەڵ میدیای رەسمی عێراق لەبارەی لادانی لە پۆستەكەی، رایگەیاند"من بەشێوەیەكی یاسایی نەك بە رێككەوتنی سیاسی پارێزگاری كەركوكم، من جێگری پارێزگارێكی هەڵبژێدراو بوم و بەشێوەیەكی یاسایی پۆستی پارێزگارم وەرگرتوە."
ئاماژەی بەوەشداوە كە لەو رێككەوتنە سیاسییەی كە هەیە هیچ بڕگەیەك نییە بۆ گۆڕینی پارێزگار، بەڵكو پێكهێنانی لیژنەیەك هەیە بۆ هەڵسەنگاندنی كاری پارێزگارە بەوەكالەتەكان و پاشان بڕیاردان لەبارەیانەوە.
راكان سەعید جبوری، لە ئۆكتۆبەری 2017دا لەدوای گەڕانەوەی هێزەكانی عێراق بۆ كەركوك و ناوچە جێناكۆكەكان و پاشەكشێی پێشمەرگە لەو ناوچانە، بە بڕیاری حەیدەر عەبادی، سەرۆك وەزیرانی ئەوكاتی عێراق كرایە پارێزگاری كەركوك بەوەكات كە پێشتر جێگری پارێزگار بو.
راكان جبوری لەمیانی چاوپێكەوتنەكەیدا لەگەڵ میدیای رەسمی عێراق جەختیشی كردەوە كە بەبێ رێكاری یاسایی یاخود تاوەكو ئەنجامدانی هەڵبژاردنی پارێزگاكان، ناكرێت لە پۆستەكەی لادرێت.