ناوەندى پاراستنی گەل رایگەیاند، تەقینەوەكەی ئەستەنبوڵ هیچ پەیوەندییەكی بەئەوانەوە نییە.
ئاوێنه: نەپەگە (14-11-2022) لە بەیاننامەیەکدا رایگەیاند "هیچ پەیوەندییەكی ئێمە بەو ڕووداوەوە نییە، ئێمە ڕاستەوخۆ هاوڵاتی مەدەنی بە ئامانج ناگرین و هەرچالاكییەك كە هاوڵاتی مەدەنی بە ئامانج بگرێت قبوڵی ناكەین".
دەشڵێت " لەناو توركیادا بە ئامانجگرتنی هاوڵاتی مەدەنی لەلایەن ئێمەوە نا مومكینە و ئاشكرایە لەبەرامبەر تێكۆشینی ڕەوای ئێمەدا، ڕژێمی ئاكەپە و مەهەپە تەنگەتاوبووە، بەتایبەتی ئاشكرابوونی بەكارهێنانی چەكی كیمیایی و سوتاندنی سەربازانی خۆیان".
سولەیمان سۆیلۆ، وەزیری ناوخۆی تورکیا (دووشەممە 14-11-2022) ڕایگەیاند، " ئەنجامدەری تەقینەوەکەی شەقامی ئیستقلالی ئیستانبوڵ دەستگیرکراوە کە بەگوێرەی لێکۆڵینەوەکان لە عەفرینەوە هاتووەتە ناو خاکی تورکیا و بڕیاری تەقینەوەکە لە کۆبانێ دراوە".
ئاماژەی بەوەشکردووە، "بەگوێرەی ئەو بەڵگانەی دەستمان کەوتوون پەکەکە و پەیەدە لە تەقینەوەکە بەرپرسیارن".
ئێوارەی دوێنێ یەکشەممە 13-11-2022، تەقینەوەیەک شەقامی ئیستقلالی شاری ئیستانبوڵی هەژاند و بەهۆیەوە شەش کەس گیانیان لەدەستدا و زیاتر لە 80 کەسی دیکەش برینداربوون.