پێشەوا هەورامانی، وتەبێژی فراكسیۆنی پارتی لە پەرلەمانی كوردستان، نەوت و غازی هەرێمی كوردستان بە "كارتە سوتاوەكان" ناودەبات و دەشڵێتو هەولێر ئەتوانێت لە ئێران و ئازەربایجان و كەركوكەوە غاز هاوردە بكات.
ئاوێنە: پێشەوا هەورامانی، ئەمشەو(چوارشەممە)، لە هەژماری خۆی لە فەیسبوك لە نوسینێكدا رایگەیاندوە"هەرێمی کوردستان سەرو ٤٠٠ هەزار بەرمیل بەرهەمی نەوتەکەیەتی، نەوتی سلێمانی پێكدێت لە نەوتی حەسیرە كە ۱٤ هەزار بەرمیلە لە ڕۆژێکدا لەگەڵ نەوتی چەمچەماڵ كە ۱٥ هەزار بەرمیلە لە ڕۆژێکدا."
وتوشیەتی"لەبەرانبەردا نەوتی هەولێرو دهۆک پێكدێت لە خورمەڵە ۱٤٠هەزار بەرمیل لە رۆژێکدا، شێخان ٤٥ هەزار بەرمیل نەوت لە ڕۆژێکدا، تاوکێ ۱٠۹ هەزار بەرمیل لە ڕۆژێکدا، سەرسنگ ٥٠ هەزار بەرمیل نەوت لە رۆژێکدا."
ئاماژەی بەوەشداوە كە "پلانی ستراتیژی سەرۆک وەزیران مەسرور بارزانی نە نەوتەو نە غاز، بەڵکو کشتوکاڵ و پیشەسازی و دۆزینەوەی سەرچاوەی دیکەی داهات و دابینکردنی ئاسایشی خۆراکە بۆ هەرێمی کوردستان، ئەمەیە جیاوازی پیاوی دەوڵەتمەدارو پیاوی مەچەکهەڵکردن و هەڕەشەکەری گرتنەوەی غازو دو ئیدارەیی."
لەبارەی غازیش وتەبێژی فراكسیۆنی پارتی وتویەتی"غازی کۆرۆمۆر لە بڕی بەرهەمهێنانی ٥٠٠ ملیۆن پێ لە ڕۆژێکدا، زۆربەی بۆ کارەبای هەمو کوردستان و LPG پارێزگاکان بەکاردێتەوەو دانا گاز گرێبەستی هەیە لەگەڵ حکومەتی هەرێم و ئەم غازە موڵکی هیچ حزبێک نییە تا شان و باڵی پێوە با بدرێت."
ئەوەشی وتوە"ئەگەر هەرکەسێکیش کێشە بۆ بەرهەمهێنانی دروستبکات لەبەرانبەر داوا یاساییەکانی دانا گاز خۆی دەبینێتەوە کە گرێبەستێکی تەمەندرێژی هەیە لەگەڵ حکومەت! ئایا کەسێک دەیەوێت ببێتە سزادراوێکی نێودەوڵەتی، ئایا لایەنێک هەیە جورئەتی ئەوە بکات دەبا بیکات!"
هەروەها ئاماژەی بەوەشداوە "هەولێر بۆ پێداویستی ڕۆژانەی غاز دەتوانێت لە ڕێگای ئازەربایجان و ئێران و کەرکوک غاز هاوردە بکات، ئایا ئەمە ئەو کارتەیە کە هەولێری پێ ڕابگیرێ یان کارتێکی سوتاوە!"
لەگەڵ ئەوەش وتویەتی"بیرمان نەچێت کێڵگەی بنەباوی_پیرمام داهاتوی غاز دەبن و بڕێکی زۆری غاز خەمڵێندراوە لەکاتی کەوتنە سەر سکەو بەرهەمهێنان."