فەرماندەی هێزی زەمینی سوپای پاسدارانی ئێران رایگەیاند، هێرشەكەی ئەمڕۆیان بۆ سەر بنكەكانی پارتی ئازادی كوردستان لە پردێ بە موشەك بوەو دەشڵێت، هێرشەكانیان بۆ سەر بنكەو بارەگاكانی حزبەكانی رۆژهەڵاتی كوردستان لە هەرێم بەردەوام دەبن.
ئاوێنە: محەمەد پاكپور، فەرماندەی هێزی زەمینی سوپای پاسداران، بە میدیای وڵاتەكەی راگەیاند، لە درێژەی هێرشە موشەكی و درۆنەكانمان بۆ سەر بنكەی حزبەكانی رۆژهەڵاتی كوردستان، ئەمڕۆ سێشەممە، بە موشەك هێرشمان كردە سەر بنكەكانی پارتی ئازادی كوردستان لە ناوچەی پردێ و لە قوڵایی خاكی هەرێمی كوردستاندا.
محەمەد پاكپور ئاماژەی بەوەداوە كە پارتی ئازادی كوردستان، پشتیوانی لە خۆپیشاندانەكانی كوردستانی ئێراندا كردوە كە ئەو بە "كاری تێكدەرانە" ناوی بردوە.
فەرماندەی هێزی زەمینی سوپای پاسدارانی ئێران جەختی كردۆتەوە كە هێرشەكانیان تا چەككردنی حزبەكانی رۆژهەڵاتی كوردستان لەنێو هەرێم بەردەوام دەبن.
داواشی لە خەڵكی هەرێمی كوردستان كردوە دەوروبەری بنكەو بارەگاكانی حزبەكانی رۆژهەڵاتی كوردستان، چۆڵ بكەن.