بەپێی راگەیەندراوێكی نوسینگەی بافڵ تاڵەبانی، سەرۆكی یەكێتیی نیشتمانیی كوردستان، لە كۆبونەوەی ئەمڕۆی نێوان ناوبراو و لایەنە سیاسییەكانی هەرێمدا لە دوكان، داواكراوە "هەنگاوی کرداری خێرا بۆ چارەسەرکردنی کێشەکان بنرێت" و "کار بکرێت بۆ دروستکردنی ئەنجومەنێکی باڵا لە ھەرێم بە بەشداری ھەمو لایەنەکان بۆ بڕیاردان و دۆزینەوەی چارەسەر بۆ تەواوی کێشەکان."
ئاوێنە: نوسینگەی بافڵ تاڵەبانی لە راگەیەندراوێكدا وتویەتی، ئەمڕۆ پێنجشەممە، لەسەر بانگهێشتی سەرۆکی یەکێتیی نیشتمانیی کوردستان لە ھاوینەھەواری دوکان، کۆبونەوەی لوتکەی لایەنە سیاسییەکانی ھەرێمی کوردستان لە چوارچێوەی دیالۆگی نیشتمانی بە ئامانجی یەکڕیزی و چارەسەری کێشەکان لە عیراق و ھەرێم بەڕێوەچو.
بەپێی راگەیەندراوەكە، تەوەری سەرەکی کۆبونەوەکەی ھاوینەھەواری دوکان گفتوگۆکردن بو لەسەر دوایین گۆڕانکاری و پێشھاتە سیاسی، ئابوری و ئەمنییەکانی ھەرێم و عیراق و ناوچەکە.
لە راگەیەندراوەكەدا هاتوە"کۆبونەوەکە جەختی لە توندوتۆڵکردنی پەیوەندی نێوان ھێز و لایەنە کوردییەکان کردەوە و بەپێویست زانرا ھەنگاوی کرداری خێرا بۆ چارەسەرکردنی کێشەکان بنرێت. ھەروەک ھاوڕابون لەسەر زەمینەخۆشکردن بۆ فراوانکردن و بەردەوامی کۆبونەوەی لایەنە سیاسییەکانی کوردستان، پەرەپێدانی پەیوەندییەکان و یەکخستنی ھێز و تواناکان دور لە تێڕوانینی حزبی بەمەبەستی چارەسەرکردنی ئەو کێشانەی روبەڕوی واقیعی ھەرێم و عیراق بوەتەوە، ئەم ئامانجەش لەپێناو زاڵبون بەسەر تەحەددییەکاندا."
لە بەشێکی تری کۆبونەوەی ھاوینەھەواری دوکان، كۆی لایەنەکان جەختیانکردەوە لە بەردەوامی دیالۆگی لایەنە سیاسییەکان بە ئامانجی گەیشتن بە پرۆژەیەکی ھاوبەشی کوردستانیی یەکڕیزی نیشتمانی. ئەوەش بەپێی راگەیەندراوەكە.
ئاماژەی بەوەشداوە كە "كۆبونەوەكە هەڵوەستەی جددی لەسەر خراپی و نالەباری ژیان و گوزەرانی خەڵک كرد و رونکرایەوە، ژیان و دۆخی خەڵک گەیشتوەتە ئەو ئاستەی ھەمو لایەنە سیاسییەکان ھەنگاوبنێن و ھاوکاربن بۆ چارەسەرکردنی کێشەکان و باشترکردنی ژیانی ھاوڵاتییان و ھەرێمی کوردستان لەروی ئابوری، سیاسی و ئەمنییەوە."
هەروەك بەپێی راگەیەندراوەكە لە كۆبونەكەدا داواكراوە "کار بکرێت بۆ دروستکردنی ئەنجومەنێکی باڵا لە ھەرێم بە بەشداری ھەمو لایەنەکان بۆ بڕیاردان و دۆزینەوەی چارەسەر بۆ تەواوی کێشەکان و ئەو پرسانەی رەھەندی نەتەوەیی و نیشتمانییان ھەیە. ئەم ھەنگاوەش بە فاکتەری پاراستنی یەکڕیزی، پارێزگاریکردن لە ئەزمونی ھەرێم، بەدیھێنانی خۆشگوزەرانی زیاتر بۆ کۆمەڵانی خەڵک، بەھێزکردن و پارێزگاریکردن لە قەوارەی ھەرێم لە قەڵەمدرا."
لە راگەیەندراوەكەدا هاتوە"کۆبونەوەكە پێداگری لەسەر ئارامی و سەقامگیریی ئاسایش، سەروەری یاسا و دامەزراوەکانی دەوڵەتداری و بەگژداچونەوەی گەندەڵی، روبەڕوبونەوەی بەھەدەردانی سامانی گشتی و سەرخستنی پرۆسەی چاکسازی راستەقینە کردەوە."
بەپێی راگەیەندراوەكە "بڕیاریشدرا ئەم کۆبونەوانە لەپێناو تەبایی، یەکھەڵوێستی و یەکڕیزیی کوردستانی بەردەوامی ھەبێت."