مەزڵوم عەبدی: پێویستە ئەمریکا هەڵوێستی توندتری بەرامبەر هەڕەشەکانی تورکیا هەبێت
  2022-11-26       430       

فەرماندەی هێزەکانی سوریای دیموکرات(هەسەدە) وتی، داوا لە ئەمریکا دەکەن کە "هەڵوێستی توندتر"ی بەرامبەر هەڕەشەکانی تورکیا هەبێت.

ئاوێنە: مەزڵوم عەبدی، فەرماندەی هێزەکانی سوریای دیموکرات(هەسەدە)، ئەمڕۆ شەممە، لە كۆنگرەیەكی رۆژنامەوانیدا لەبارەی ئەوەی ئەگەر تورکیا هەڵوێستی ئەمریکاو روسیا و ئێرانی لەبەرچاو نەگرت و هەر رژدبو لەسەر ئەوەی هێرش بکات. وتی، "پێویستە هەڵوێستیان هەبێت، ئێمەش ئەوەمان لێ پرسین ئەگەر تورکیا هەڵوێستی ئێوەی لەبەرچاو نەگرت و دەرباز بو.. ئێمە داوامان لێکردن کە هەڵوێستیان توندتر بێت، لەو باوەڕەشداین هەڵوێستیان توندتر بێت."

وتیشی"داواکاریی ئێمەش ئەوەیە ساڵی 2019 رێککەوتنێک کرا، بەپێی ئەو رێککەوتنە ئەگەر هاتو تورکیا پابەند نەبێت بەو رێککەوتنە پێویستە سزا بەسەر تورکیا بسەپێندرێت، ئێمە داوا دەکەین بەپێی ئەو رێککەوتنە بڕیاری خۆیان بدەن."

فەرماندەی گشتیی هێزەکانی سوریای دیموکرات لەبارەی هێرشەکانی ئەمدواییەی تورکیا بۆسەر رۆژئاوای کوردستان رایگەیاند: "ماوەی حەوت رۆژە هێرشەکانی تورکیا بۆسەر هەرێمەکەمان بەردەوامە لە رێگەی تۆپ و فڕۆکە و لەسەر زەمین، هێرشێکی بەرفراوانی دەستپێکردوە".

بەوتەی مەزڵوم عەبدی، جیاوازیی ئەو هێرشە لەگەڵ هێرشەکانی پێشو ئەوەیە "تەنیا هێزە سەربازییەکان نەکراونەتە ئامانج، بەڵکو هێزە مەدەنییەکانیش بە ئامانج دەگرن، تاوەکو ئێستا 14 کارمەندی گواستنەوەی مەدەنی شەهیدبونە، لەگەڵ 16 سەرباز. هەروەها جیاوازیی هێرشەکانی ئەم جارە ئەوەیە چەندین شوێن کراونەتە ئامانج، هێرش کراوەتە سەر دامەزراوە سەرەکییەکانی ئەو هەرێمە، شوێنی کارەبا، غاز و تاوەکو ئێستا 45 دامەزراوە کراونەتە ئامانج. ئامانجیشیان ئەوەیە ژیانی کۆمەڵایەتی و ئیداری لەو هەرێمە نەهێڵن. بە کورتییەکەی ئامانجی تورکیا ئەوەیە ژێرخانی ئەو هەرێمە لەنێو ببات و رێگە لەبەردەمی خۆش بکات بۆ ئەوەی هێرشی زەمینی ئەنجام بدات".

فەرماندەی هێزەکانی سوریای دیموکرات وتیشی، پشتڕاستن لەوەی تورکیا خۆی بۆ ئەنجامدانی هێرشی زەمینی ئامادە کردوەو ئاماژە بە لێدوانێکی رەجەب تەیب ئەردۆغان، سەرۆککۆماری تورکیا داو وتی"ئەردۆغان لە لێدوانێکدا ئاماژەی بەوەدا ئەوان دەیانەوێت هێرشی کۆبانێ، منبج و شەهبا بکەن لە رێگەی گروپە چەکدارەکانی سەر بە تورکیا لە سوریا."

بەوتەی مەزڵوم عەبدی، تورکیا بۆ ئەو هێرشەی، "هێرشەکەی ئیستەنبوڵی کردوەتە پاساو، بەڵام دەمەوێت ئەوە بڵێم کە ئێمە دور و نزیک پەیوەندیمان بەو هێرشەوە نییە. پێشتریش رامانگەیاندوە، ئێمە داوای لێکۆڵینەوەمان کردوە لەسەر ئاستی نێودەوڵەتی بۆ دەرکەوتنی راستییەکان، ئەوانەی ئەو هێرشەیان ئەنجامداوە ئەوانە پەیوەندییان بە رێکخراوی تیرۆریستی داعشەوە هەیە".

فەرماندەی هێزەکانی سوریای دیموکرات ئاماژە بەوە دەدات، ئەگەرچی ئەوان حەز ناکەن شەڕ بکەن، بەڵام ئەگەر بێت و تورکیا هەر رژد بێت لەسەر ئەو هێرشە، ئەوا ئەوانیش بەرپەرچی دەدەنەوە و وتی"راستییەکەی تورکیا خۆی بۆ هێرشێکی زەمینی ئامادە دەکات، ئێمەش وەکو هێزێکی سەربازی ئامادەین، شەڕێکی بەرفراوان بکەین هاوشێوەی ئەو شەڕانەی پێشتر کراوە، ئەگەر شەڕ دروست ببێت ئێمە مافی خۆمانە بەرگری بکەین. وەک هێزی سەربازی و گەل ئامادەین بەرپەرچی ئەو هێرشە بدەینەوە، بەڵام لە هەمانکاتدا نامانەوێت شەڕ دروست ببێت".

مەزڵوم عەبدی، باسی زیانەکانی ئەو هێرشانەی كرد کە کراوەتە سەر هێزەکانیان و کاریگەریی بەسەر ئۆپەراسیۆنەکانیان لە بەرامبەر داعش و وتی"ئەو هێرشانەی تاوەکو ئێستا کراون، زیانی زۆریان بە ناوچەکە و ژێرخانەکەی گەیاندوە و هۆکاریش بوە لە وەستاندنی ئۆپەراسیۆنەکانمان دژی داعش، چونکە ئەو هێزانەی ئێمە کە شەڕی داعش دەکەن، ئێستا بونەتە ئامانجی ئەو هێرشانە".

لەبارەی هەڵوێستی هێزە نێودەوڵەتییەکانیش لەبەرامبەر تورکیا لەو هێرشەی بۆسەر ناوچەکانی ژێر دەسەڵاتی هێزەکانی سوریای دیموکرات ئەنجامی دەدات، مەزڵوم عەبدی وتی"تاوەکو ئێستا چەندین هێزی نێودەوڵەتیی دژی ئەو ئۆپەراسیۆنە وەستاونەتەوە، ئێمە دەزانین ئەمریکا و روسیاش دژی ئەو هێرشەن، ئەمەش بە هەوڵێستێکی باش دەزانین، بەڵام دەوڵەتی تورکیا رژدە لەسەر ئەو هێرشە، بۆیە ئەگەر هەڵوێستێکی توندی نێودەوڵەتی نەبێت ئەوا تورکیا هێرشەکانی بەرفراوانتر دەکات. بەهۆی ئەوەی بەشێکی ئەو هەرێمە عەرەبییە، پێویستە وڵاتانی عەرەبیش هەڵوێستێکی رونیان هەبێت، چونکە ئەو هێرشەی تورکیا دەیکات داگیرکردنی وڵاتێکی عەرەبیشە."

زۆرترین بینراو
© 2023 Awene Online, Inc. All Rights Reserved.
×