سێ پۆستی دیکەی حكومەتی عێراق بۆ پارتی و یەكێتی یەکلابونەوە، کە بەوتەی پەرلەمانتارێک، دوانیان دەدرێن بە پارتی و یەکێكیان بۆ یەکێتی دەبێت.
ئاوێنە: شێروان دوبەردانی، پەرلەمانتاری پارتی لە پەرلەمانی عێراق، ئەمڕۆ دوشەممە، بە میدیای حزبەكەی راگەیاند: ”سێ پۆستی دیکەی کورد لە بەغدا یەکلایی کرانەوە، پۆستی وەزارەتی ئاوەدانكردنەوە بۆ پارتی دیموکراتی کوردستان و وەزارەتی ژینگە بۆ یەكێتی، هەروەها راوێژکاری سەرۆکوەزیرانی عێراق بۆ کاروباری ئێزدییەکان دراوە بە پارتی دیموکراتی کوردستان."
بەگوێرەی زانیارییەكان بەنگین رێکانی لە پارتی دەبێتە وەزیری ئاوەدانکردنەوەی عێراق و لە یەكێتیش ناوی (رێباز بێرکۆتی و نزار ئامێدی) بۆ وەرگرتنی پۆستی وەزارەتی ژینگە پێشكەشكراون، كە تاوەکو ئێستا بەڕەسمی ناوەکان رانەگەیەندراون.
هەروەها پۆستی راوێژکاری سەرۆک وەزیرانی عێراق بۆ کاروباری ئێزدییەکان دراوە بە پارتی و خالیدە خەلیل کە پەرلەمانتاری خولی پێشوی پەرلەمانی عێراق بوە، پۆستەكە وەردەگرێت.