وەزارەتی كاروباری شەهیدان و ئەنفالكراوانی هەرێم، ئەمڕۆ هەینی، رایگەیاند، دوێنێ ١ی کانونی یەکەمی ٢٠٢٢، لە قەزای چەمچەماڵ ٢٦٠ پارچە زەوی بەسەر زیندانیانی سیاسیدا دابەشکرا.
ئاوێنە: وەزارەتەكە لە راگەیەندراوێكدا وتوشیەتی"ئەمەش دوای دەرچونی فەرمانێکی مەسرور بارزانی، سەرۆکی حکومەتی هەرێمی کوردستان کە لە رێکەوتی ٢٣ی تشرینی دوەمی ٢٠٢١، کە هەریەک لە وەزارەتی کاروباری شەهیدان و ئەنفالکراوان و وەزارەتی شارەوانی گەشتوگوزار بۆ ئامادەکاری و وردبینی کردن لە ناوی کەسەکان راسپاردبو بۆ پێدانی ئەو زەوییانە."
بەگوێرەی راگەیەندراوەكە، "لە فەرمانەکەی سەرۆک وەزیراندا هاتوە کە ئاماژە بە کۆبونەوەی ئەنجومەنی وەزیران ژمارە (٣٨) لە رۆژی ١١/ ٢/ ٢٠١٧ و لە ژێر رۆشنایی یاسای ماف و ئیمتیازاتی کەسوکاری شەهید و ئەنفالکراوەکان لە هەرێمی کوردستان ژمارە ٩ی ساڵی ٢٠٠٧ و یاسای ئیمتیازاتی زیندانیکرا و گیراوانی سیاسی کوردستان ژمارە ١١ی ساڵی ٢٠١١ بڕیار درا بە جێبەجێ کردنی فەرمانی سەرۆکایەتی ئەنجومەنی وەزیران ژمارە (٨٦٧،٨٦،٨٦٩) لە رێکەوتی ٢١/٢/٢٠١٨ تایبەت بە تەرخان کردنی زەوی بۆ ١١ هەزار و ١٤١ هاوڵاتی لە میراتگرانی شەهیدان و ئەنفالکراوان و جینۆساید و زیاندانیانی سیاسی و رزگاربوانی شاڵاوی ئەنفال لە سنوری پارێزگا و ئیدارە سەربەخۆکان لە هەرێمی کوردستان."
فەرمانەکەی سەرۆکی ئەنجومەنی وەزیران ئاماژە بەوە دەکات کە، "ئەو کارە دوای وردبینی کردن لە تەواوی ناوەکان و دڵنیابون لە بونی مەرجەکانی تەرخانکردنی زەوی تیایاندا، ئەوەش لە رێگەی لیژنەیەکی پسپۆڕە کە نوێنەری هەریەک لە وەزارەتەکانی کاروباری شەهیدان و ئەنفالکراون و شارەوانی و گەشتوگوزار تێدا بێت."
هەر بەپێی فەرمانەکەی سەرۆک وەزیران، "پێویستە وەزارەتی شارەوانی و گەشتوگوزار کاری پێویست ئەنجام بدات بە وردبینی کردنی لیستی ناوەکانی مامەڵەکانی تەرخانکردنی زەوی لە سنوری ئیدارەی گەرمیان (کەلار و کفری) لەگەڵ دابینکردنی زەوی پێویست بۆ مەبەستی جێبەجێکردنی فەرمانەکە."